U Symbood Montri Rangbah uwa pait leh yaka chnat PWD (Roads), u Prestone Tynsong da ong u wa ka sorkar ym hun ko yei rukom kreh ka National Highways & Infrastructure Development Corporation Limited (NHIDCL) ya ka sarok ha ka tnaaiñ Riwar Mihngi.
Da ong u wa kmen u wa ki dkhot yong ka Synjuk ki Rangbah Shnong deilang wa ki seiñbhalang da mih ki chakhmat wow yakhih, wei oo leh kyrchaan u yeini i yakhih neibhah da yoo wa i rukom krehkaam yong ka NHIDCL da man iwa pher bha, wei da khana u wa ha Assam leh ki paidbah da ood ki yei rukom krehkaam yong kani ka Company wa chna sarok.
Hawa kylli, u Prestone da ong u wa daw khut biang ya ka yalang yow bichaar yei long i man i kaam wei hadien itæ daw pyntip yei rai yong ka sorkar.
Ka Joint Action Committee yong ka Federation of Riwar Mihngi Local Dorbars, wa kynthup ya ki seiñbhalang wa kiwa yahkhmat chnong da toor ki cha ka yung krehkaam ka National Highways & Infrastructure Development Corporation Limited yow dawa na ka sorkar wow pynkreh bha ya u sarok Shillong-Dawki, wei hadien wa yachem wa u Branch Manager ka NHIDCL, ka JAC da e por ko 20 sngi yow pyndep ya u sarok wei lym kamtæ ka JAC daw ujor ko da ka PIL cha ka High Court.
Discussion about this post