Khut ka sorkar ya kiwa yahkhmat wa hakhlieh dooh ka HNLC wow wan yaklam biang

U Symbood Montri Rangbah wa pait yaka chnat Kaam Pohyung (Police), u Prestone Tynsong da ong u wa ka sorkar jylla kamjooh ka sorkar pyrdi da khyrngiat ki wow yoo yaka chithi na ka seiñ Hynniewtrep National Liberation Council (HNLC) kawa da pyntip wa da mih noh ki nei yaklam yasuk deiwa pynbaad neidaw wym khooid ka sorkar hei yaklam.

Heijooh i por da ong wa waroh ar ki sorkar dang kwah ki wa ka HNLC u pyrkhat biang ko yow wan chakhmat neibynta wow yaklam tangwa da ban biang u wa i yaklam toh u man ko wa kiwa hakhlieh dooh ka seiñ kiwa ye wow wan chim yei rai. Da ong chooh chooh wa lada ki dkhot ka HNLC ym sñiaw chngaaiñ de ki wow yaklam hapoh Meghalya, ka sorkar smat ko wow yaklam ha kawon kawon ka thaw neibhah angnood wow poi noh cha i yasuk.

Hawa pynsñiaw leh yei eh wow yaklam wa ki dkhot wa rap khian wa mihkhmat yaka HNLC, da ong wa i yaklam haka kylla kawa nyngkong toh kawa biang bha, tangwa kiwa mihkhmat wa phah da ka HNLC da ong bait ki wa kwah ki wow yaklam chwa wa kiwa yahkhmat wa hakhlieh dooh neidaw wym ye u chim rai, wei na ini i daw ka yaklam haka yalang kawa ar emkaam wow emlang bait noh kiwa yahkhmat wa hakhmat ka HNLC.

U Prestone da ong u wow pynbaad yaka sorkar wym em ap ko yei dawa wow pyndam ya ki Case toh i wym yahaap neibhah da dep klam che da ki ksiang wow e yei pyrtuid ki dkhot kiwa em Case yow yaklam pynbait kammon u leh.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Hawa yatoh wa i e laad wow lai laitlooid ka HNLC, da ong u wa ka sorkar da e laad ya ki wow psiah u mih laitlooid haka jylla.

Hawa yatoh wa i dawa wow pyndam noh yaka HNLC nei chah kheiñ kam ka seiñ pyrchah aiñ, da ong wa kani toh ka yaklam yasuk kawa dang sdang iwa mut wa lada dep lut i yaklam ya kawi pa kawi ka phang, waroh ar ki sorkar daw chim ki ka rai wow chim noh yei rai wow pyndam noh yei kheiñ pyrchah aiñ.

Hajrong won wa i chah khut hajir ki dkhot ka HNLC, u Symbood Montri Rangbah da ong u wa ymtoh iwa da leh da ka sorkar tangwa iwa da leh da ka yung bichaar, wei neitæ i daw ka sorkar nadooh wa sdang da paan ko yei pyrtuid ki dkhot kiwa em Case khnang yow ye u leh iyi iyi.