U Rollingson Dkhar da kyntait lut u yei chah pynbaad u haka chnong Saipung wa da pynmynsoo bru u neitæ tba kti u ya kawi ka manbei deilang wa ki khon ko kamjooh wa dawa poisa u Rs. 15 lak na ki kattu katni ngut kiwa chong chnong ka Saipung kamjooh i chah pynbaad wa sai Pistol u.
U Rollingson hei pynche u da khana u wa ini waroh toh iwa da sdang haka 8 tarik uni u bnai heiwa heipor 9:00 waje i step da em wa pyntip cha oo wa em ki bru wa da wan wow ah wei deiñ ya ki dieñ kseh wa ki dieñ khloo wa em hei thaw yong oo iwa tip kam i Krem Dakha iwa em hadien ka yung krehkaam ka Saipung C&RD Block Office.
U Rollingson da chem u wa ki bru wa leh yeini wow ah ya ki dieñ u toh u Priceless Darnei, u Lalramzoma Nampui, u Riamthanga Thianglai wa u Ruaiia Darnei kamtæ da khut u ya ki wow wan yachem ha Kupleng Outpost, East Jaiñtia Hills District haka sngi wa bood ka 9 tarik tangwa kini ki bru ym em wan ki hadien wa yang u ya ki waroh chi sngi, kamtæ da pynbait wow yachem haka 10 tarik ha iwi won i thaw tangwa kini ki bru ym em biang wan ki.
Hadien ini, haka 17 tarik da em wa pyntip cha u Rollingson heipor 10:00 waje i step wa da em biang kiwa wan ah dieñ hei jooh biang i thaw u, kamtæ da lai wut-wut cha katai ka thaw heiwa da chem ya kawi ka Truck wa em Number ML-11-6822 kawa dang thap dieñ wei ki dieñ wa boon toh kiwa da chah ah wei da dep ki leh wow kit da boon kari.
Heini i por da khut u ya uwa yah ya kani ka Truck uwa da khana wa u Priceless Darnei wa phah leh yeini wei da phah lai yah ya oo cha i yung u Priceless wei manda poi ha yung u Priceless da phla u wa toh oo wa phah ya u Lalramzoma Nampui, u Riamthanga Thianglai wa u Ruaiia Darnei wow lai pam ya kitai ki dieñ.
Kamtæ da lai yah u Priceless cha kini ki yung kini ki le ngut tangwa kini da yut noh ki hadien wa tip ki wa da wan u Rollingson.
Neidaw wym yoh u yachem wa kini ki bru, neiliang u Rollingson da ong u ya u Priceless wa toh u su u ya kini ki dieñ wa da dep pam wei du kamni donhi da mih liwan noh u.
Chooh chooh u Rollingson da pynche u wa da wan u samen chapoh kani ka chnong deiwa emlang uwa yah kari yong oo uwa da neh hapoh kari, ymtoh kamwa da pynbaad wa yah u wa ki lok u.
Heiyatoh won wa i pynbaad wa tympiah u ya ki Mobile Phone wei tba kti u ya ki kynthai, u Rollingson da kyntait u yeini waroh deiwa ong wa ini toh i pharep donhi.
Hajrong won i pynbaad wa sai Pistol u, u Rollingson da ong u wym jooh em Pistol u.
U Rollingson da ong u leh wa kini ki bru da pam ki ya ki dieñ yong oo hadooh wa da ban da tymmoh ki yaka RCC Canal wa da chna da ka chnat Water Resources.
Kamtæ u Rollingson da ong u wa ini i chah pynbaad u toh neidaw wa kwah ki u lait nei hap u su yaka bai dieñ wa ah ki heiwa oo da biang lut u ki sabut tangwa kini ki bru da pyrchang noh ki wow dai sarom oo deiwa pynmih khubor yow pynsih yei pyrtuid u kam u bru wa wan thombor du wow lait ki u su ya kani ka bai dieñ wa da dep ah tooh ki.
Puræ leh: Dawa ki paidbah ka chnong Saipung wow kem ya u Rolingson Dkhar wa ki lok u
Discussion about this post