Republic Day: Yoh nyngkong ka JNV Mukhla na ki skur, ka Horticulture na ki chnat sorkar

Ka West Jaiñtia Hills District da ya ksohkti ko wa waroh kawi ka ri yow lehkmen yaka 75^th Republic Day ynne ka sngi. 

Ha Jowai da wan u Montri ka chnat Animal Husbandry & Veterinary, u A.L Hek wow pynhær yaka lama ka ri wei da chim u leh yaka Rashtriya Salute hapyrdi i rwai yaka National Anthem da ka JNV School, Mukhla haka lehkmen wa da pynman ha madan Jrisaleiñ, Jowai. 

Neiliang u Montri hawa e khublei ya ki paidbah da pynkynmoo u ya kiwa chong chnong ya kitu kiwa da yaleh yow yoh laitlooid wei da khana u leh ya ki moomær wa da poi ka jylla.

Ha ka yaleh March Past da chimbynta da 20 tylli ki liang wa kynthup ya ki District Police Jowai, ki NCC na JNV Mukhla, Government Girls Higher Secondary Schools, Jowai neitæ ki West Jaiñtia Bharat Scouts & Guides, Jowai wa 15 tylli ki skur. 

Da pynyoo rong leh da ki 15 tylli ki chnat sorkar ya ki kaam wa da leh ki deiwa pynchna pynriam da ka ki kari.

Neiliang u Montri da saam u leh ya ki Certificate cha kiwa jop March Past wa yoh nyngkong da ka JNV Mukhla, wa ar ka St. Mary Mazzerrello Higher Secondary School, Jowai katwa hei wa le da yoh ka Government Boys Higher Secondary School, Jowai. 

Na ki chnat sorkar da yoh nyngkong ka yung krehkaam u District Horticulture Officer, Jowai, hei wa ar da yoh ka District Commerce & Industries Centre, Jowai katwa yei wa le da yoh ka Divisional Soil and Water Conservation Officer Territorial Division Jowai.

Da saam leh ki khusnaam Top Performing PHC cha ka Sahsniang PHC deiwa ye ki u pynkrehkaam bha yaka Megha Health Insurance Scheme (MHIS) wa yaka Ayushman Bharat Pradhan Mantri Jan Arogya Yojana (ABPM-JAY). 

U Montri da pynkup burom u leh ya u Havildar Amplias Synnah wa u ABC Arki Nikhla u pulit ka ANTF yei chakri yong ki.  

Ha kani ka lehkmen Republic Day da yoh leh ki rwai ki chaad na ki khynnah skur wa na ki dong ka chong Jowai, da em leh i lai saam baam cha ki Children’s Home da ki chnat sorkar wa ki seiñ kreh monsñiawbha.

Ha Amlarem Civil Sub-Division da lehkmen yaka Republic Day ha madan ka Amlarem Government Lower Primary School heiwa yaka lama ka ri da wan wow pynhær da u MLA ka thaaiñ, u Lahkmen Rymbui uwa da chim leh yaka Rashtriya Salute hapyrdi i rwai yaka National Anthem da ka Riwar Jaintia Church of God Secondary School, Jadjaplem.

Ha ka March Past da chimbynta da 7 tylli ki liang wa kynthup ya ka chnat Police deilang wa 6 tylli ki skur. Neiliang ki chnat sorkar da wan 8 tylli kiwa da pynriam ya ki kari yow pynyoo ya ki kaam wa da leh ki. 

Ha ka March Past da jop da Ka Syiem Jingsuk Higher Secondary School, Amlarem katwa ka Amlarem Secondary School da yoh wa ar ko. 

Da pynkup burom leh ya u Dapki Shylla, BLO ka 4-Iongnoh uwa da yoh yaka State Award yei lehbha u yei kaam u. Da em leh ki rwai ki chaad tynre wa da e da ki khynnah skur ha kani ka sngi.

Ha Hima Shangpung, Laskein C&RD Block da lehkmen yaka Republic ha madan Hula, Moosyiem, Shangpung heiwa u MLA ka Jowai, u Wailadmiki Shylla da wan u wow pynhær yaka lama.