Ka Election Commission of India da pynmih ko yaka Report yong ka poisa wa da yoh sñiawbha ki seiñ saiñhima kiwa da tipmit hapoh ka ri (Recognized National Parties) neibynta u snem 2022-2023 wei kani ka poisa toh kawa da e sñiawbha da ki bru paidbah, ki karkhana wa kiwi de ki seiñ heiwa kiwa da pynyoo hapoh ka Report toh du ya kitu kiwa e Rs. 20,000 chaneiñ.
Kamwa man kattæ ki Recognized National Party hapoh ka ri toh ka Indian National Congress Party, ka National People’s Party, ka Bharatiya Janata Party, ka Communist Party of India (Marxist), ka Aam Aadmi Party waka Bahujan Samaj Party.
Katkam ka Report wa da e da ka NPP neibynta u snem 2022-23 da yoh ko Rs. 7,47,95,975 heiwa na kani kawa boon dooh wa yoh ko toh na u Rimifull Shylla uwa da e Rs. 4,00,00,000, u Ian Samuel Rs. 75,00,000, ka Meghalaya Cement Limited won da e ko Rs. 50,00,000, u Dominic Sutnga 50,00,000, u Marak Ar. L. Stone Rs. 35,00,000 wa u Sailen Nongrum uwa da e Rs. 35,00,000.
Ki pyrtuid kiwa da mih hapoh ka Report ka NPP da em ki 35 tylli nadooh i yong ki bru samen, ki dukan wa ki karkhana.
Ha ka Report wa da e da ka Congress won da em 894 tylli ki pyrtuid heiwa kawa heh dooh wa da yoh sñiawbha ki toh na ka M/s MKJ Enterprise Ltd kawa da e Rs. 5,00,00,000 le sien, ka Nuvoco Vistas Corporation kawa da e chisien Rs. 2,50,00,000 wei da e biang sa chisien Rs. 3,00,00,000 neitæ ka Aculife Healthcare Pvt Ltd kawa da e 2,00,00,000. Na ki bru samen, u K.J. George da e u arsien chisien Rs. 50,00,000 wa Rs. 45,00,000 wa u Deepesh Parwal uwa e Rs. 35,00,000 arsien.
Ki karkhana na Meghalaya wa da e sñiawbha cha ka Congress toh ka Star Cement kawa e da u Anil Prakash Sharma Rs. 2,00,000 wa Rs. 1,00,000 won na u Girish Chandra Bahunguna.
Kiwa boon dooh kiwa e sñiawbha toh cha ka BJP kawa da em hadooh palat 400 sla i pyrtuid ki bru samen, ki karkhana, ki Company kiwa da e yarap cha ka Party heiwa ka Harmony Tree Gold Pvt Ltd da e ko Rs. 50,00,000 arsien, ka Pacific Development Rs. 50,00,000 le sien, ka Shree Ganesh Construction Rs. 50,00,000, ka Gudur Ceramics Rs. 50,00,000, u K. Rajgopal Reddy Rs. 5,00,00,000.
Ka Chennai Green Wo da e sñiawbha ko palat 50 sien kiwa Rs. 1,00,000 chisien. Ka Hetero Labs Ltd da e ko Rs. 1,00,00,000 arsien wa kiwi kiwi de.
Ki karkhana wa em hapoh Meghalaya kiwa da e sñiawbha cha ka BJP toh ka Meghalaya Cements Limited kawa da e Rs. 10,00,000 neitæ ka Meghalaya Bitchem Private Limited kawa da e Rs. 25,000.
Ya kini ki Report ka Election Commission ye phi u yoh heini.
Discussion about this post