Uwi u bru uwa na Pune, Maharashtra uwa khih kaam yong samen uwa tip kam u Sandeep Suresh Kamble, da chem yei metyap u na iwi i kamra ka Radission Blu Hotel wa em ha Guwahati, Assam haka 5 tarik uni u bnai da kiwa kreh ha kani ka thaw hi.
Ki pulit da poi ki cha kani ka Hotel ynnin heipor 4:00 waje i janmiet heiwa da chem wa u Sandeep uwa sah haka kamra Room No. 922 da thiah yap u deiwa kai boon i snaam wa mih na oo.
Hei takit ki pulit da chem wa u Sandeep da psiah u yow sah ha kani ka Hotel haka 5 tarik heipor kamwa 12:50 i sngi deilang wa kawi ka kynthai wa tip kam ka Anjali Shaw (25 snem) kawa na South Baksara, Howrah District ka West Bengal.
Lyngba ka CCTV da chem wa kani ka bru da mih ko na kamra wa sah u Sandeep deilang wa uwi won u bru uwa tip kam u Vikash Kumar Shaw (23 snem) heipor 2:45 i sngi uwa na Hrishikesh Ghosh Lane, Saikia, Howrah District, West Bengal wei ini u bru toh uwa wan sah ha kani hi ka jooh ka Hotel haka kamra Room No. 1024.
Ki pulit da pynpoor ki yei dur yong kini ki ar ngut heiwa da chem wa da thmu ki wow hær cha Kolkata na Guwahati Airport heipor 9:15 i miet.
Kamtæ da booh thaw pynsangeh kari ha waroh ki luti wa lai cha Airport heiwa heipor 5:42 da yoh wow kem ya kini ki arngut heipor wa dang lai ki cha Airport.
Katkam wa pyntip ki pulit, u Sandeep toh uwa dai kari wei uwa dai moolangnai wei uwa da hap lai cha kylleiñ ka ri neibynta i kaam u wei ha iwi na ini ha u Naikhynde 2023, da yachem u waka Anjali kawa kreh ha kawi ka Restaurant wa em ha Kolkata Airport heiwa da ya e kylliang ki ya ki Phone Number yong ki wei hadien ini da yajan wei da sdang ki leh wow ya sah miet ha ki Hotel wa em ha Kolkata wa Pune.
Ha kini ki por, u Sandeep da chondur u leh yaka Anjali heipor wa ya thiah ya dem ki wei da e sñiawbha u leh ya ka chiboon ki tiar wa sy’at. U Sandeep hanla man u uwa da dep bia, da kwah u leh wow bia noh waka Anjalai wei da pynbor u yaka wow yalait noh wa u chan ko, u Vikash.
Kamtæ kat dang lai i por da sdang sih i emyatoh ki wei ka Anjali da sdang ko wow yait oo u Sandeep tangwa oo won da sdang u wow Phone cha kiwa ha-yung ko kamjooh cha u chan ko yow pynbor ya oo wow yalait noh waka yow ye u pynbor bia ka wei da phah u leh yei dur heipor wa emlang u waka Anjali cha u chan ko u Vikash.
Neidaw wym neh chah de yeini wa pyndik u Sandeep. Ka Anjali deilang wa u Vikash da sooh buit ki wow yachem wa u Sandeep hapoh Hotel yow tooh noh ka ka Mobile Phone u yow lait u maham u pynyoo bru yei dur wa chon u. Wei da thmu nyngkong ki wow yachem ka Anjali wa u Sandeep ha Kolkata heiwa u Vikash daw wan u yow knieh yaka Phone.
Da thmu ki wow leh yeini deiwa pynbaam ya u Sandeep da ki lado wa em dawai yoh thiah deiwa khlehlang wa u bhang yow pynyohthiah oo khang yow suk ki u knieh yaka Phone u wei da thied ki leh ya ki tylle yow kdoh oo.
Yow leh ya ini waroh, ka Anjali da khut ko ya u Sandeep wow yachem ha Kolkata kamwa jooh leh ki tangwa u Sandeep won da ong u wow yachem ha Guwahati.
Kini ki 3 ngut da mih ki jar jiar i por yow lai cha Guwahati heiwa ka Anjali da pyntip ko cha u Vikash wa sah ki ha i kamra Room No. 922 wei u Viskash manda wan u da yoh u sah ha i kamra Room No. 1024.
Yow ye u Vikash u psiah cha ka kamra wa sah ki, ka Anjali da ieh ko yaka dwar khlem khang wei heipor 2:00 waje u Vikash da psiah u kamwa da sooh buit ki tangwa da mih noh i yachoh hapyrdi u Sandeep wa u Vikash heiwa u Sandeep da mynsoo joor u wei da khlaad noh u hadien.
Hadien wa yoo ki wa da joor mih snaam u Sandeep nei khmut u wei da yap ler u, da rai noh ki wow mih noh napoh kani ka kamra wei heipor 2:45 da mih noh ki napoh kani ka Hotel wei nyngkong da lai ki chawa ki cha Kamakhya Railway Station tangwa rai won ki wow chim noh da ka lieñsuiñ kawa daw mih heipor 9:15 i miet.
Ki pulit da chem ki leh yei snaam yong u Sandeep ha ki sula wa sap u Vikash, da chem ki leh yaka Mobile Phone, u lado wa da khleh lang wa u bhang, ki dawai kuli Anti-Depressant wa ki dawai yoh thiah.
Da kem leh ya ki Mobile Phone kini ki arngut heiwa da chem yeiwa yaklam (Text Chats) ki wow leh ya ini waroh.
Discussion about this post