U Prime Minister warim ka Netherlands, u Dries van Agt deilang waka kurim u ka Eugenie da rai ki wow pynkut noh yei mynsien ki deiwa yarap ka sorkar haka 5 tarik uni u bnai ha i chnong wa sah ki ha Nijmegen.
Kini ki chi kurim toh kiwa da em 93 snem i rta wei da khlaad ki deiwa ya ksohkti lang hadien wa da ya bia ki la 70 snem tam.
Ini i rukom pynkut yei mynsien wa tip kam i Euthanasia namo ka Duo Euthanasia manda leh ki chi jur toh iwa da chah u leh da ka aiñ hapoh ka ri Netherlands deiwa e deiwa Inject dei dawai wow pynkut yei mynsien.
U Dries van Agt da man u kam u Prime ka Netherlands nadooh u snem 1977 hadooh u snem 1982 wei da man u leh kam u Ambassador ka European Union cha ka Japan wa United States.
Kiwa e ktien ya kini ki chi kurim da ong ki wa da leh yeini hadien wa da dep ki u yaklam para chi yung chi sem wei da khlaad ki deiwa ya ksohkti lang hadien palat 70 snem i man kam chi kurim.
Ha u snem 2019, u van Agt da yoh u yaka Brain Haemorrhage heipor wa dang e u yei klam paidbah wei ym em de chait u na ini katwa i chait ka kurim toh i wym em da khana paidbah.
Ha Netherlands katkam ka aiñ chah ki leh ya kawa tip kam ka Assisted Suicide heiwa u bru Inject hi u yow pynkut yei mynsiem deiwa emlang u Doctor wa pait wei ka Euthanasia won toh kawa da Inject dawai da ki Doctor deiwa yoh bor.
Ha Netherlands da da chah wow leh yaka Assisted Suicide wa Euthanasia nadooh u snem 2002 heiwa ha u snem 2020 da chah ka sorkar wow leh yeini neibynta ki 26 ngut, ha u 2021 won 32 ngut wa 58 ngut ha u 2022.
Ki bru wa da chah u leh ki yeini toh kiwa da joor ware i kjut i chitom ki wym ye du chah yei kjut wei ki wym ye de u pynchait.
Discussion about this post