U Montri Rangbah ka jylla, u Conrad K Sangma ynne da wai u yaka yaaw wa em ha Tura kawa emlang leh wa i thaw pynyieñ kari kawa tip kam ka Najing Bazaar kawa man da ka yung khyndaw bilat kawa da chna kyrpang ya kiwa beh yaaw kiwa wan na ki chnong wa em cha palatsor.
U Conrad da lai pait lai sylli u ya kani ka yaaw yei rukom chna ka deiwa emlang ka Agatha K Sangma, MP ka Tura Parliamentary Constituency, u E. Kharmalki, IAS Director, Urban Affairs Department, ki synjuk waheh chnong wa kiwi de.
Kam u kongsan ha kani ka sngi, u Conrad da ong u wa i kreh yaka Najing Bazaar Project toh yow pynkylla dur ya ki yaaw ki haat da kiwa yahaap wa iwa emkaam ka juk wa katni deiwa ya krehlang waka chnong ka thaw.
U Conrad da pyntip u wa deilang waka Najing Bazaar da sdang leh kiwi kiwa boon ki kreh yow pynku yaka chnong Tura wei da pyrkhat leh yow wanrah yaka Integrated Secretariat Complex yow pynsuk ya ki paidbah wa lai emkaam yow wan ki du ha kawi donhi ka yung wa emlang ki chnat sorkar wei ya kani da booh bhah ka poisa wa Rs. 120 klur wei daw emlang ko leh waka CM Office, Cabinet Office, ka Conference Room wa kiwi de kiwa emkaam.
Da khana u leh wa yow booh ya waroh ki chnat sorkar da emkaam yei thaw wa heh 25 Acre wei da yoh leh yaka poisa yow chna yaka IT Park hadooh Rs. 120-130 klur heiwa i kreh yaka bynta wa nyngkong namo ka Phase-I daw pyndep noh wei ka Phase-II daw sdang ha u Naikhynde-Naichiphaw.
Da khana u leh wa ya kani ka Najing Bazaar da sdang i kreh nadooh u snem 2009 tangwa da ieh khlem pyndep wei da ye u sdang biang u kreh ka ha u snem 2020, kamtæ da sñiawkmen u wa da ye u pyndep noh u chna ka.
Neiliang ka Agatha K Sangma leh da pynsñiaw ko yei kmen wa da pyndep noh u chna ya kani ka yaaw kawa da angnood da slem bha wei kattu daw man kani ka thaw kam i pdeiñ ka Tura iwa pynyoo leh yei roi i paar ka chnong Tura wei ym ieh du heini tangwa daw pynkylla leh ya waroh ki kdong ki chmiang.
Discussion about this post