U MLA ka Mawhati, u Charles Marngar ynne hapoh ka yung dorbar chna aiñ da wanrah u yaka phang yaklam hajrong i eh i khoo wa maad ki bru wa im ha khappood nadooh i chah kem wei chah khrong dan khamtam kitu ki warep wa saroo ha ka Karbi Anglong Autonomous Council (KAAC) wei ini da jia i ha Umjakini Range, West Karbi Anlgong District.
Da ong u wa leh wa kani ka dan wa kheiñ toh katkam ka kari wa pynemkaam yow kit saroo wei yaka kari Bolero Pick-Up wa kit 2000 Kg u saroo da chah kheiñ dan ki Rs. 15,000. Ki kari Bolero 4×4 kawa kit 1800 Kg, da toh dan ki Rs. 13,500. Ki LP Truck wa kit 12,000 Kg da toh dan ki Rs. 90,000. Ya ki Truck 909 wa kit 9000 Kg da toh dan ki Rs. 67,500.
Da ong u wa kini ki warep wa toh dan toh kiwa na Meghalaya kiwa da chah ktah bha na ini waroh khamtam katni wa toh i por rep saroo.
Neiliang u Nujorki Sungoh, MLA ka Mowkaiaw uwa da chimbynta lang heini i yaklam, da ong u wa kiwa chong chnong ka Mukroh leh da maad ki yeini i jooh haka Forest Check Gate ka KAAC kawa em 3-4 Km na kani ka chnong wei hadooh ynnin ka sorkar Assam hanla ym em wai ko yaka Check Gate wa heh tangwa da wai ko yaka Check Gate wa rap khian hajan ini i thaw wa jooh em ka Check Gate wa nachwa wei da pynemkaam ya ka wow khrong poisa na ki warep ka Mukroh kiwa lai cha ki lyngkha yong ki, kiwa lai kit dieñ yow chet u tu, kiwa lai kit rngaw wa ki mar rep yong ki hi wei ym em pynlait ya kawon kawon ka kari wa lai na kani ka sarok.
I daw wa eh da ong u wa waroh ki thaw rep saroo, rep syiñ toh kiwa em chakhmat kani ka Check Gate wei da hap bait ki wow lai lyngba kani ka Check Gate wei da toh dan bait lada kit ki ya iwon iwon i mar rep ki.
Kamtæ da ong u wym toh u em Check Gate hapyrdi ka chnong Mukroh waka chnong Mukoilum yow chngaaiñ i lai i wan ki warep.
Heiyatoh wa ki luti syngkieñ da kyntu u yaka sorkar wow chimkhia ya u sarok Khatkasla-Jrikyndeng yow chna smat ya uni u sarok yow lait ki bru Pnar wow lai luti na ki chnong ki Karbi.
Da e nongmuna u yeiwa jia kut wa mih i kynaad ha ki thaaiñ Khanduli iwa da poor cha kiwa boon ki thaw wei da ktah i leh yaka chnong Moojem kawa jngai na chnong Khanduli wei ki paidbah da chah ktah ki neibhah ki sarok toh kiwa hap lai luti na ki chnong ki Karbi heiwa ki Karbi da tih ki ya ki sarok wei da kah ki da ki moo ki dieñ yow lait ki Pnar wow lai wei da jia chisien wa uwi u khynnah wa kjut chitom bha wa mut ki wow lai kit cha Hospital tangwa ym lait de u lai neidaw wa da chah tih u sarok wei da mut ki wow lai na u sarok Khatkasla-Jrikyndeng tangwa ym lait neibhah uni u sarok toh uwa hoi u pynemkaam du ha ki tlang donhi wym em slap.
U Nujorki da pyntip u wa uni u khynnah da khlaad noh u khlem da poi Hospital.
Neiliang u Montri Rangbah, u Conrad K Sangma hawa e yei jubab hajrong ini i chah khrong poisa da ong u wa emkaam wow pynkynmoo wa em ki por wa ong ki leh ka sorkar Assam tangwa i thaw won wa pynlai da ka Karbi Anglong Autonomous Council (KAAC).
Da ong u wa kamwa man kattæ da pynneh yaka Status Quo deiwa ieh khlem da tba ya iwa da em chwa wei ki thaw wa chah khrong dan ymtoh kiwa pait da ka Meghalaya, neibhah ha Meghalaya da kheiñ ya u saroo kam u mar rep wa tip kam u Agro Forestry Product wei ym toh dan u lada em u hapoh Meghalaya wei lada jia ini hapoh Meghalaya ka sorkar u leh ko yeiwa emkaam.
Kamtæ da ong u wa lada chah khrong dan ki toh ha ki thaw wa haap hapoh ki thaw wa pait wa pynlai da ka KAAC tangwa lada jia won ha i thaw wa em hapoh Meghalaya, neiliang ka sorkar da lait smat ko wow pynbait kam iwa da jia ha Khanduli heiwa da phah pyndam yaka Tax Gate wa booh da ka KAAC.
Tangwa da ong u wa lada ka dan wa khrong chapoh ki thaw ka KAAC kitu toh katkam ki kyndon yong ki wei lada jia won leh wa chah khrong poisa pyrchah yaka aiñ ha ki thaw wa em chapoh ka KAAC ym ye u wow leh iyi iyi tangwa kam ka sorkar Meghalaya ye ko wow yaklam wa u Montri Rangbah ka Assam yow pait u yeini.
Wei da ong u wa hadien wa da dep rai lang waka sorkar Assam wym tba u pynwit pynthut næ u tba ya iyi wa da em chwa tangwa em ki por manda jai iyi iyi toh kiwa mih na ka KAAC heiwa da em kawi ka FIR wa da e da u Ranger ko wei da em leh kiwa na Meghalaya kiwa chah kem heiwa ka sorkar Meghalaya da leh smat ko yeiwa emkaam yow pynlait ya kiwa chah kem heiwa da pynlait leh ya ki.
U Conrad da ong u kam kini wa jia wa khian wa nai pteiñ ki wow jia wei hap wow pynbait ya kini deiwa syndong bha yow lait u ktah yei kaam pynbait pood wei wow pynneh yei suk i saaiñ.
Discussion about this post