U Montri Rangbah ka jylla, u Conrad Sangma ynne hapoh ka yung dorbar chna aiñ da klam u chaphang ka tulop ki District Council khamtam hapoh ka JHADC wa GHADC, deiwa ong wa ki Council toh kiwa man laitlooid, kiwa krehkaam laitlooid namo kiwa man Autonomous, kamtæ i rukom pynlai wa i rukom su tulop leh chong ha ki bor wa pynlai ya kini ki Council.
Da ong u wa u kdoh ki cha ka sorkar jylla yow su tulop ya ki, ha iwi i rukom toh i wym sñiaw toh hok, tangwa neidaw wa em ki hapoh ka jylla wa kiwa pait leh ya ki dustur riti wa iwa emkaam ki paidbah, em leh i kithkhlieh ka sorkar wow pait kammon u yarap wei wow kyrchaan ki katwa ye.
Chooh chooh da ong u wa ka sorkar e poisa hi ko cha ki District Council katwa ye wei kut wa poi i bhah yong ki, tangwa da ong u wa emkaam wow pynbha pynmiat yei rukom kreh ki deiwa e nongmuna wa ha GHADC em 1577 ngut kiwa kreh wei ka poisa wa ye ki u pynmih waka poisa wa hap u su tulop dapoi ko hadooh Rs.3-4 klur wa duna yeiwa emkaam. Lada kheiñ sa kiwi de kiwa emkaam yow lai bait i rukom krehkaam da emkaam hadooh Rs. 5 klur chi bnai tangwa iwa ye ki u pynmih won toh du Rs. 1-2 klur chi bnai.
“Ini jooh da maad ha JHADC,” da ong u Conrad.
Da ong u wa ki District Council hap ki wow chim yei rai yow lait u lutphut ki wei wow pynrkhiñ bha yei rukom krehkaam ki wei ka sorkar Meghalaya leh u kyrchaan ko ki wei wow yahluti ki deiwa e poisa katwa ye.
Hajrong ini da ong u wa ymtoh i kitkhlieh ka sorkar Meghalaya wow su tulop ya kiwa kreh ki District Council tangwa ka sorkar toh u kyrchaan donhi hi ko ya ki.
Kamtæ da ong u wym chong hok wow pynbaad cha ka sorkar Meghalaya wym em pynlait ko ya ka tulop kiwa kreh ka Council.
Discussion about this post