U Montri Rangbah ka jylla, u Conrad Kongal Sangma da ong u wa ka chnat Kaam Pohyung (Home Police) yong ka sorkar da kreh chitom bha ko ha ki kajiak snem wa dadep yow khanglaad yei pynpoi drugs chapoh Meghalaya.
Hawa jubab hajrong i yatai hajrong i klam u Lat hapoh yung dorbar ynne, neiliang u Conrad da pyntip u wa hadooh kattæ, palat 1600 ngut ki bru kiwa da chah kem wei da pynngat 882 tylli ki Case wei na kini da em 696 tylli kiwa da chah Charge Sheet.
Da khana u leh wa da yoh u kem boon bha i drugs ha kini ki kajiak snem heiwa kamwa 40,000 gram toh i Heroin, kamwa 11,000 kilo u bhang wa kamwa 2700 gram u Opium wa kiwi kiwi ki dawai. Chooh chooh da pyntip wa ka chnat pulit da yoh ko wow kem leh yaka poisa kawa da jan poi Rs. 1 klur, neitæ ki Mobile Phone wa 323 tylli ki kari.
U Conrad da ong ba u wa hanla ka sorkar da yakhun ko tangwa da man sakhiat ko iwa eh neidaw wa boon palat kiwa pteiñ wow khayi neibhah wa ini i kaam toh iwa yoh nong bha ka poisa, wei em ki por wa ki pulit yachem ki yeiwa eh bha ha kani ka yakhun, tangwa da pynrap u wa ka sorkar daw leh ko yeiwa bha tam hawa yatoh wa ini i kaam yow pynkut syndon yei wan tooid i drugs.
U Montri Rangbah da ong u wa ka sorkar ym du wow yakhun u khang yei wan tooid i drugs, tangwa wow pynlait leh ya kiwa da kyrni hei dih deiwa booh ya ki thaw yasyllok, wei da pyntip u wa ka sorkar da pynkrehkaam ko leh yaka Drug Reduction Elimination and Action Mission (DREAM).
Discussion about this post