Ka rynsan pynyoo yei sap i tap ki khon khynroo khyllood wa tip kam ka 3rd East Jaiñtia Got Talent 2024 deilang waka Miss Divine Beauty Pageant 2024 kawa da pynman ar sngi ha Rymbai Iawpyngsing, East Jaiñtia Hills District da ka East Jaiñtia Hills District Youth Development Society, Rymbai da pynkut noh hei janmiet yong ka 10 tarik uni u bnai.
Ha ka 9 tarik da pynman yaka East Jaiñtia Got Talent heiwa u Rimiki Thoo da pynyoo pyrthai u yei sap rwai wei da yoh syndon u yei naam jop, hei wa ar da yoh ka Rimika Bareh kawa na chong Rymbai kawa da pynyoo yei sap rwai katwa ka Buhmon Jooh na ka chnong Iongnoh, West Jaiñtia Hills District kawa pynyoo yei chaad da yoh ko hei wa le wei kini kiwa jop da yoh ki leh yaka song poisa deilang wa ki Certficate. U kongsan ha kani ka sngi toh u Jackie Khontiang.
Hei janmiet yong ka 10 tarik won da pynman yaka Miss Divine Beauty Pageant 2024 deiwa wan sakhi u Afasting Nongtdu kam u kongsan. Ha kani ka yakob miat kynthai, ka Risaka Phawa kawa na chnong Tuberkmai Chnong da yoh ko yei naam jop, ka Fortunate Dkhar na ka chnong Iongkaluh da yoh wa ar ko katwa ka Lizamary Shylla kawa na Byndihati da yoh wa le ko wei ya kini ki le ngut da jop ki leh yaka song poisa wei da yoh ki leh ya ki Certficate.
Neiliang kiwa yahkhmat ka East Jaiñtia Hills District Youth Development Society, Rymbai wa kynthup yaka President, ka Alagrity Bareh, ka General Secretary, ka Btinmame Bareh wa u Chief Adviser, u Deibormi Syad, da ong ki wa kani ka rynsan toh yow yarap u kyntu wei leh wow pynyoo pyrthai yei sap i phong yong ki khon khynroo khyllood yong ka thaaiñ wei da sñiawsuk ki leh wow tip wa kiwa boon ki khon khynroo khyllood ka thaaiñ da mih ki chakhmat lyngba kani ka Society heiwa kiwa boon ki khynroo da ye ki wow kynjoh chooh chooh cha kiwi ki rynsan wa rap heh lyngba i yarap lang kani ka Society.
Kamtæ da yooluti wa daw nang boon ki khon khynroo khyllood kiwa da mih pyrthai lyngba kani ka Society kawa na Rymbai, East Jaiñtia Hills District.
Discussion about this post