Ynne ka sngi kawa man ka sngi pynkut ya ka Dorbar Mang Tangka ka JHADC hadien wa yaphyllu yumut hajrong i pynlut wa i yoh poisa ka Council, neiliang u CEM hawa klam pynkut da ong u wa ha uni u snem thmmye i pynlut man i Rs. 13 klur tam neiwa toh u yoh poisa ka Council wei chwa wow pynkhreh ya ka mang tangka, ka EC da chong pyrkhat yillu ko kammon u pynduna yei lut poisa ha kawi pa kawi ka chnat.
Da ong u wa da ye u pyndam ya i pynlut wa khlemkaam wei hanla kattæ dang kynjoh Rs. 13 klur i yaphær neiwa pynlut wa neiwa yoh.
U Thombor da ong u wa ka pyrthai yoo ko kammon chah ktah ka Council khamtam nadooh wa khang ya u mooyong wa da duna bha i yoh dan.
Da ong u wa ka EC ha uni u snem daw thooh ko kammon u pynku yei yoh poisa ka Council neibhah katkam wa man katni ka dan wa boon dooh wa yoh toh na ka Major and Minor Minerals deiwa pynrap ka EC u yaleh ko u thooh ki laad yow lait de ko u chaniah na ka sorkar.
Chooh chooh da ong u wa emkaam u pynkhlan ya ki Check Gate neibhah wa em i lait-tooh (Leakage) ka poisa wa toh u yoh ka Council u khrong.
Da pynkynmoo u leh wa ka sorkar jylla da klam che ko wa ym ye ko wow bahkhlieh yaka tulop kiwa kreh hapoh JHADC katwa kamtæ emkaam bha u thooh luti wow pynbait ya ini.
U Thombor da ong u leh wa iwa joor i dooh bhah ka Council toh na ka Transport heiwa boon ki tre kari na Ri-loom Jaiñtia phah Register kari ki cha Shillong bait katwa kamtæ duna noh i yoh bhah ka JHADC wei boon iwa yoh bhah toh cha ka KHADC.
Heijooh i por da klam u leh ya ki phang wa yatoh wa i yoh ka Council u khrong dan kam na ki mar pohkhyndaw heiwa i bhah ka Council dang sahteiñ i khamtam wa ka sorkar jylla ym pynlait ko ya kani ka poisa.
Da khana u leh ya ka bhah wa toh u yoh katkam wa da pynkhreh ka Council kam na i pynroi sor, i uiñke suwari wa kiwi kiwi.
Discussion about this post