Da: U Shimphang Lyngdoh, Lumputhoi EJH
Sñiawkhia i chiboon kam ka jaitbru,
Na ka sorkar wym em pyrkhat yillu;
Wow kynthup lang ya ka ktien Jaiñtia,
Ha i rwai State Anthem ka Meghalaya.
Da khreh ki u mylliñ u lyndet ya i,
Ka Ri kawa em yei yong ka hi i parom hiar pateiñ;
Wei leh won se wym em pyrkhat jngai?
Chwa wow pynlait paidbah yeini i rwai.
Hawa yoh u ap u sñiaw yeini,
Da sñiaw sah khonswet sah rangli;
Ka Ri wa em naam em burom,
Em ko jar jiar i yong ka hi i parom.
I yukylli wa heh da mih i heini,
Wow kylli syndon pyn da nga da phi;
Kiwa mihkhmat na Ri-Loom Jaiñtia,
Ym em hok ki mo heini u ya embynta?
Ri-Loom Jaiñtia, Ri wa maya,
Ha pha em chiboon i parom khana;
Wym ye u len wym ye u murieh,
Em sakhiat ki na tre hadooh khlieh.
Yi wa nooh u beiñ yi wa nood u khoh?
Yei hok ka Ri-Loom Jaiñtia watoh u yoh!
Ka Ri kawa em ha ka, ka Dustur ka Riti;
Hoi hi mo u chah ieh syngngait kamni?
Da mih i pyrchah na kiwa boon wa lang,
Hapoh Jaiñtia kynthai wa chynrang;
Ka JHADC hapoh Yung Dorbar da yatai,
Yei ktien yong ka wow emlang ha i rwai.
Da kawa burom kyntu O ya ka sorkar,
Sñiawbha pyrkhat to sñiawbha bichaar;
Ham pait chiliang khmat; to pyrkhat yillu,
Ha Meghalaya em kamwa le tylli ki jaitbru.
Discussion about this post