U National General Secretary ka NPP, u Sniawbhalang Dhar da ong u wa ka Congress toh kawa da em hapoh ka Intensive Care Unit (ICU) wei ym em yumut wow jied biang ya u kyrtong ko, u Vincent H Pala na Shillong Parliamentary Constituency.
Da ong u leh wym em yumut wow jied yaka Voice of People Party (VPP) wa United Democratic Party (UDP) neibhah kini toh ki wow kut du kat ha Byrnihat donhi wei ym poi ki cheiwon cheiwon leh.
Yeini da ong u ha ka yalang wa da pynman ha Byrnihat, Ri Bhoi ynnin ka sngi yow lai yalap Election neibynta ka kyrtong ka NPP na Shillong, ka Ampareen Lyngdoh.
Da kdaw u leh yei long i man ka Congress katni kawa da em sa du 5 ngut ki MLA ha Meghalaya wei hapoh Parliament won da em ko du 40-50 ngut donhi ki MP. Kamtæ da ong u wa yow krum u phah biang da u MP ka Congress kawa katni kawa da rem chwa.
Kamtæ da kyntu u ya ki paidbah wow thap cha ka kyrtong ka NPP ka Ampareen Lyngdoh.
Chooh chooh da ong u wa ki paidbah toh kiwa biang dooh wow bichaar ya u Vincent Pala ya ki 15 snem wa da man u kam u MP.
Da khana u wa oo kam u Montri ka chnat Transport da dep yaklam u waka sorkar pyrdi yow chna yaka sarok Eight Lane na Khanapara cha Byrnihat waka Four Lane na Umroi cha Jaiñtia Hills yow pynkyllooid ya ka luti syngkieñ.
Da yaroh u leh ya u MLA ka Jirang, u Sosthenes Sohtun yei kreh chitom u yow wanrah ya ki kaam pynroi hapoh ka Constituency heiwa ym dam u wow yaleh wa u Montri Rangbah man ka janmiet yow pynroi yaka Constituency.
Da ong uwa da yoo ya ki dak ki chin hapoh ka Constituency ka wym em de sahdien ha ki sarok, ka umkor, ka puræ puthi wa kiwi kiwi de deiwa pynrap wa ka Jirang deilang waka Ranikor toh kiwa yoh boon dooh ki kaam pynroi naka sorkar.
“U Sothenes toh uwa kreh chitom bha uwa da lai yania wa u Montri Rangbah man ka janmiet, heiwa myntu daw klam u chaphang ka umkor, hadien 2-3 sngi won chaphang ki sarkor hadooh wa manda wai u yaka dwar u Montri Rangbah, neiliang u Montri Rangbah da ong bait u iyi kwah myntu won wei ini pynyoo toh wa em u yei kitkhlieh neibynta ki paidbah,” da ong Sniawbhalang.
Neiliang won u MLA warim ka Sohiong, u Samlin Malngiang da ong u wa ka NPP toh ka Party kawa em yurim wei em ko leh kiwa yahkhmat wa biang kam u Conrad K Sangma wa ki arngut ki Symbood Montri Rangbah kitæ u Prestone Tynsong wa u Sniawbhalang Dhar. “Kamtæ ki paidbah toh u thap ki cha ka NPP ha kani ka Election yow pyntikna wa wanrah yei roi i paar ha waroh ki liang ka jylla,” da ong u.
Ya ka yalang da pynlai da u MLA ka Jirang deiwa emlang ki dkhot ka Party.
Discussion about this post