Sdang ka ECI da ka KYC App yow tip ki paidbah ya ki kaam pyrchah aiñ ki kyrtong kamjooh ka spah ka phaw ki

Ka Election Commission of India (ECI) kam chibynta wow yarap ya kiwa thap Vote u tip ki chaphang ki kyrtong MP chwa kani ka Election Lok Sabha 2024 da chna ko da ka App kawa tip kam ka ‘Know Your Candidate’.

Neiliang u Chief Election Commissioner, u Rajiv Kumar da pyntip u wa kani ka App daw yarap ko ya ki paidbah yow tip ki kiwon ki kyrtong kiwa leh ya ki kaam pyrchah aiñ wei ya kani ka App toh kawa ye u pynemkaam ha ki Phone Android wa iOS.

Da ong u wa waroh kiwa thap Vote em ki yei hok wow tip uwon u kyrtong wa da leh ya ki kaam pyrchah aiñ kamjooh katwon ka spah ka phaw, ki thaw ki bhaw, ki yung ki sem wa kiwi de kiwa em ki.

Ya kani ka App ye wow Download naka Google Play Store wa na Apple App Store wei ki paidbah ye ki u thooh ya uwon uwon u kyrtong wei daw pynyoo lut ya waroh iwa yatoh wa oo næ ka deiwa booh bniah hadooh ki jait aiñ wa tyngkheiñ ki kamjooh ka spah ka phaw ki.