Uwa yahkhmat ka United Democratic Party (UDP), u Kyrmen Shylla uwa man leh u Montri ka sorkar jylla da ong u wa kam kiwa chong chnong toh u jied ki ya u kyrtong na ka seiñ ri-loom cha ka Lok Sabha yow em yei bor wa i sur kawa thai wow klam ya ki phang yong ka jylla.
“Hanla kiwa boon jooh klam ki wym em yumut ki wow jied ya ki kyrtong na ki seiñ ri-loom wow lai mihkhmat yaka jylla cha Delhi, tangwa toh u sñiawthooh ki won ki wa du kiwa mihkhmat na ki seiñ ri-loom kiwa em yei bor wa i sur wa thai yow pynsñiaw yei eh hapoh Lok Sabha,” da ong u Kyrmen Shylla hawa yaklam wa kiwa thoh khubor ynne ka sngi.
Da ong u leh wa ki paidbah toh u sñiawthooh ki wa hanla ki seiñ ri-thor næ kitæ ki National Party man ki ki seiñ kiwa heh wei kiwa pynmih boon ki dkhot hapoh ka Lok Sabha, tangwa hawa kut lada ka Meghalaya sai ko da ki MP na ki National Party, ym ye ki wow klam yei eh ka jylla næ wow klam pyrchah ya kiwa yahkhmat yong ki.
U Kyrmen da e nongmuna u wa lada jied ya u MP na ka Congress, daw hap u wow klam bait ya iyi wa man hapoh ka seiñ ki wei ym nood u wow klam yei eh næ ki phang wa klam pyrchah ya kiwa yahkhmat kam ya u Rahul Gandhi, kamjooh leh ki MP ka BJP kym nood ki wow klam pyrchah ya u Narendra Modi næ u Amit Shah neibynta i eh ka jylla.
“Tangwa i kam ki seiñ ri-loom won hawa jop u kyrtong yong i, u e lut i yei bor i sor ya oo wow klam u ha Parliament wei wow pynsawa haaw yei sur neibynta ki kaam wa i eh i khoo yong ka jylla ka yong i,” da ong u Kyrmen.
Da ong u leh wa u kyrtong wa da sai da ka UDP wa HSPDP hapoh ka Regional Democratic Alliance, u Robertjune Kharjahrin da man sakhiat u uwa biang uwa da em chwa yei stat i tip heiliang ka aiñ, kamtæ man u uwa biang tam wow mihkhmat yaka jylla cha Parliament.
Discussion about this post