Ynne ka sngi ki paidbah ka chnong Sohmynting, West Jaiñtia Hills District da lai ujor ki ha Jowai Police Station pyrchah ya uwi u bru wa da tip pyrtuid kam u Ialam Makri uwa na ka chnong Umsning, Nongthymmai, Ri-Bhoi District hajrong ki kaam thok chukor yong oo deiwa kam wa oo toh u bru yong ka Gas Agency, kamtæ da chim poisa u na ki paidbah kiwa kwah u yoh kum Gas chet (Gas Cylinder), kiwa kwah u yoh Stove chet wa kiwi won ki tiar wa yatoh neibynta ka Gas.
I ngop ki paidbah ha ki buit thok uni u bru toh uwa ong u wa man u kam u bru ka Gas Agency wei kular u leh wow pynyoh lyngba ka M/s Ripnar wa M/s Rymbai Gas Agency kiwa em ha Jowai, kamjooh leh lyngba ka Cash Memo chim poisa kawa da soi u hei pyrtuid Indane Cylinder Gas Store waka Indane Gas Cylinder, heijooh i por paan haroh u ya ki kot ki sla yong kitu kiwa da em Gas chwa kiwa dang kwah u yoh chooh ki kum Gas waka Stove chet wei em leh ki kattu katni kiwa da pynyoh kum Gas wa thylli u.
I rukom chim pisa yong oo won toh Rs. 2500 neibynta kitu kiwa kwah da u kum Gas thylli, Rs. 3750 kitu kiwa kwah da u kum wa dap, Rs. 4000 neibynta u yoh uwi u kum Gas waka Stove chet wa Rs. 6000 won neibynta ar tylli ki kum Gas deilang waka Stove.
Katwa dang yooluti ki u yoh yow kum Gas, ka Stove wa kiwi ki tiar katkam wa yakut wei dep su poisa, nanglai ki tayaaw ki bnai wei da jan dap chi snem kattu wei manda Phone ki cha oo leh wym bna hi u, heitæ sñiawthooh ki wa hanpaya da chah thok.
Kamtæ lyngba ini i mih chakhmat wow ujor yooluti ki leh wa ka aiñ u kem ko ya oo wei wow pynchitom oo najrong wow su lut u leh ya waroh ka poisa wada chim u deiwa thok chukor.
Na ki paidbah ka chnong Sohmynting ka poisa wa da chim u dapoi ko cha ka Rs. 3 lak tam na ki 93 ngut.
Katkam ka khubor wa da yoh u lum, uni u jooh u bru ym du wa li thok u yaki paidbah ka chnong Sohmynting, tangwa heijooh hi i rukom da lai li thok wei chim poisa haroh u na ki paidbah ka chnong Nartiang Modop, West Jaiñtia Hills, na ki paidbah ka chnong Madur, West Jaiñtia Hills wa kiwi won ki chnong deiwa yoh rah da ki lak tangka na man ki chnong.
![](https://i0.wp.com/wyrta.com/wp-content/uploads/2024/03/dkslk.jpg?resize=960%2C540&ssl=1)
![](https://i0.wp.com/wyrta.com/wp-content/uploads/2024/03/dkslk1.jpg?resize=960%2C540&ssl=1)
Discussion about this post