U Working President ka National People’s Party (NPP), u Wailadmiki Shylla da ther u deiwa khor ya uwa yahkhmat ka VPP, u Ardent M Basawiawmoit deiwa ong wa nachwa ha i por wa man u kam uwa yahkhmat ha ka seiñ UDP da klam u wa lait na ka Party UDP wym em de ka Party ka wa maya jaitbru. Hadien won manda yut seiñ u deiwa psiah won cha ka Party HSPDP, i jooh hi ong u wym em Party de wa maya jaitbru kat ka HSPDP, neitæ won manda yut na ka HSPDP psiah won u cha ka National Party da ong wan wa ki Party ri-loom ymtoh kiwa hoi. Kattæ won da seiñ u da ka Party thymme yong oo.
Chooh chooh u Wailadmiki da kynthah u yaka Party thymme deiwa ong wa man ko kam u slap laproo, wei lada neh slem ko daw pynsih pynjæd ko ya ki khon khynroo khyllood ka jylla.
U MLA ka Jowai da ong u leh wa kani ka Party VPP da pynsñiawthooh bakla ko ya ki paidbah deiwa kam wa du ki kiwa maya jaitbru wei da kylli u leh wa kammon katæ ka maya jaitbru deiwa yahluti ya ki khon khynroo khyllood u mih cha sarok wei u pynsñiawthooh bakla ya ki.
Da khyrwit u leh yei pynkhih kani ka Party yaka Reservation Policy deiwa pynsñiawthooh bakla wa lada pynkrehkaam ka katkam wa kwah ki, waroh u yoh kreh, tangwa katkam i chem ym ye u man neibhah man-u-snem kamwa 60,000 tam ki khynroo khyllood kiwa mih yow thooh khih thooh kreh.
U Wailadmiki Shylla da ong u leh wa kiwa yahkhmat yong ka VPP kiwa kam ya idæ kam kiwa maya jaitbru da sñiaw ki kam ki bru wa dang thymme hei kaam saaiñ pyrthai, deiwa pynrap wa u bru wa da jooh rem Election la ar sien u batai u ya uwa da jop la san sien ban-ban wei yeini da kdaw u hajrong i klam pyrchah u ya u Symbood Myntri Rangbah ka jylla, u Prestone Tynsong deiwa kylli kammon ki paidbah u pynjop ki oo lym em kreh hok u.
Discussion about this post