U kyrtong ka Voice of the People Party (VPP), u Dr. Ricky A J Syngkon hadien wa pyndep yei thap pyrtuid yaleh Election MP ynne ka sngi, da kyntait u wow khana ya ki phang wa ka VPP u lai ko cha ki paidbah ha kani ka Election, deiwa ong wa Party daw pynbna ko ya ini waroh ha ka Manifesto wa daw pynmih ha kini ki kajiak sngi wow wan.
Da ong u wa ka VPP u lai ko cha ki paidbah da ka synchaar khadar kawa khooid kawa lait nei baam tooh wow yakhun pyrchah yei dooh i duk wa i leh chiliang khmat, wei kiwi de ki yurim toh wow yada yei hok hawa yatoh wa i khyndaw u chyiap waka khayi ka pateiñ.
Da pynsñiaw u leh u yei kyrmen wa skem wow yoh yei jop ha kani ka Election MP wei da ong u leh wa heipor wa yaleh Election MLA u ha u 2023 na Umsning heiwa da yoh u hei wa soo toh neidaw wa ka Party dang man ko kawa thymme heitu i por wei ki paidbah leh ym tip wei ym sñiawthooh ki yaka yurim wa yaleh Election ka Party.
Heiyatoh i wym em wan u President ka Party ha ini i lai thap pyrtuid, u Dr. Ricky da pynche u wa ka Party da em ko i pynbait chwa wow pynman ki yalang paidbah kamtæ, u Ardent da lai u cha kitæ.
Heiyatoh won wa i chah pynbaad ka Party wa da klam bakla ya ki heh Balang, da ong u wa kini ki bru toh u ap ki dei miat iyi iwa da klam u Ardent.
Hawa kylli won yei e jait cha u pa, u Dr. Ricky ym bien u wow ong iyi iyi katwa heiyatoh won wa i pyrchah ktien Hindi, da ong u wa ym jooh em ong ki wa pyrchah ktien Hindi wei kitu wa ong yeini toh du wow yah bakla ya ki paidbah.
Discussion about this post