Jowai : Ka Rilum Social Welfare Organisation (RSWO) West Jaintia Hills District da pynman ko ïa ka prokram ïaphyllu jingmut kawa chisngi kawa da tip kam ka One Day Consultation Programme on National Population Registre (NPR) wa ka Aadhar Number, ïa kani ka prokram da pynman ha District Auditorium Library, Jowai.
Ha kani ka prokram u Rev Dr P.B.M Basiawmoit da batai bnaih u kummon krehkaam wei myntoi kamjooh i duh myntoi nei pynemkaam ïa u Aadhaar Number. U Rev Basiawmoit da ong u wa ha u snem 2013 wa ka sorkar UPA II, da jubab ko ïa ka Supreme Court wa utæ u Aadhaar numbar ymtoh u wow pynbor ïa ki nongchong chnong yong ka Ri India wow em ki tangwa man ko katkam i kwah samen u bru, u chim namo u dam (Voluntary and not Mandatory). Ha ka 23 Naikhynde 2013 ka Supreme Court da e rai ko wa ym hoi pyndooh myntoi ïa ki paidbah du neidaw wym em ki ïa u Aadhaar Number.
Da ong chooh chooh u wa i pynemkaam ïa u Aadhaar da kiwa boon ki Agency, daw pyllait paidbah ïa ka identity Card, weiwa lada pynemkaam bakla ïa uni u numbar daw booh ko yei jingeh wa ha rukom.
Da ong u leh wa ym ye u kdoh (Control) ïa ki wow pynemkaam ïa u Aadhaar yong phi næ ym ye u tip yei pynemkaam da kiwi tawan. I tip waroh chaphang yong ki paidbah kiwa kyntup ïa ka biometrics yong phi daw pynlai da ka company bar-ri.
Ynne ka sngi ïa kani ka yalang da pynlai da u ma A.Kassar, Vice President RSWO, hei emlang wa u Rev R.M. Syngkon wa kiwi kiwi.
Discussion about this post