Ynne ka sngi hadien wa ka Seiñraij Jowai da pyndep ko yaka chaad ka kmen yong ka Chaad Sukra 2024 ha Myngkoi Pyrdi Iongpiah kawa da sdang nadooh i por 10:00 waje i step, heipor noh chariñ sngi won ki khon ka Seiñraij da ya mih ki na Myngkoi Pyrdi wow sdang yaka chad Mih Yaaw deiwa lai lyngba ka Biar ka Blai wei heini leh da em i chaad wa chibet chipor naka Umchangiar, Dulong waka Loomkyrwiang.
Na Biar ka Blai da ya mih paidbah ki wow lai cha Iawmusiang deilang i chaad i rwai wa da chimbynta da ki khynnah wa ki waheh kynthai wa chynrang na ki dong waphær waphær deiwa bood ya ki kari wa da pynriam kyrpang kiwa tem ya jar jiar ki sur chaad sukra.
Ha ka lehkmen wa da pynman ha Iawmusiang, da wan sakhi da u Justice H.S. Thangkhiew uwa man kam u Judge ka High Court Meghalaya kam u kongsan uwa da e khublei chaad sukra ya waroh ki khon ka Niamtre wei da kyntu u leh ya ki khon ka Seiñraij Jowai wow man kiwa ri syndong wei e yada yaka riti dustur neibhah ka riti dustur e ko i tipmit yei man kyrpang ka jaitbru, wei ka jaitbru wa stat pyndooh ko yeiwa sih deiwa yaleh u pynbha pynmiat yeiwa bha.
Na kiwa boon kiwa e yei chaad ha Iawmusiang, ha uni u snem da em leh i chaad na ka Karbi Troupe, Guwahati iwa rap phær wei da pynchongchit wei pynka-it bha yaki paidbah kiwa em da ki hajar ngut kiwa da wan wow sakhi ha kani ka sngi.
Kiwi won wa chimbynta hei chaad ha Iawmusiang toh ka Khynroo Khyllood Committee Seiñraij Jowai, ka Niamtre Shillong (Student), Umchangiar, Chilliangraij, Tpep-Pale, Dulong, Sein͂raij Niamtre Ummulong, Panaliar, Iawmusiang, Loompyrdi Iongpiah, Sengkhasi Mawphlang, Seiñ Tyllilang, Loomiongkjam, Sein͂raij Shillong waka Loomkyrwiang.
Discussion about this post