Ynne ka sngi kamwa da leh ha kylleiñ ka pyrthai, ki Muslim wa em ha Jowai leh da pyndep ki yaka Eid Ul-Fitr, ka lehniam kawa jooh pynman chisien chi snem wow e ngooh wei e khublei ya u Allah.
Kani ka lehniam da pyndep hadien u bnai Ramadan u bnai wa pyndep ki yaka Ramzan iwa mut wa ki Muslim da chah thngan ki kamwa chi bnai man-ka-sngi nadooh i step chwa wow mihsngi hadooh i janmiet hadien wa sepsngi.
Ya ka lehniam da pyndep kam ka dak wow em i yabha yamiat wa i maya hapyrdi uwi wa uwi wei ymtoh u man ki kiwa yachoon wei wow burom markylliang.
Ynne i step ha Jowai da pyndep ya i ngoohblai næ ka Namaz ha Masjid kawa em ha Chahtngit ha u luti lai Shillong wa yahkhmat da u Imam næ u heh niam ki Muslim ha Jowai, u Maulana Hussain Ahmed heiwa da yahkhmat u wow puræ u ya i bynta na ka kotniam Quran.
Neiliang u Hussain da ong u wa kani ka lehniam toh ka wow burom markylliang wei wow em i yabha yamiat heiwa u man mar i jooh salonsar hapyrdi kiwa yoh wa kiwa duna hei yoh i laa.
Da ong u leh wa katkam ka Islam emkaam wa ki mahajon u e ki kajiak na ka spah yong ki heiwa chisien chi snem emkaam u e yarap ya ki manyung wa duna hei yoh i laa khamtam ki janyung ya kawa tip leh kam ka Zakat deiwa burom leh ya kiwi ki jaitniam deiwa kheiñ burom wei maya ya kiwi.
Discussion about this post