Ka Behdieñkhlam ka Seiñ Raij Kongwasan Chyrmang kawa jooh pynman khlieh u snem toh ka Behdieñkhlam wa sdang nyngkong dooh hapoh Ri-loom Jaiñtia na waroh ki Raij wa jooh pyndep yaka lehniam Behdieñkhlam, wei ha uni u snem leh i pynkhreh wow pyndep yaka da lai i chakhmat deiwa yooluti u man kawa lai bait lai ryntih wei kawa jop hadooh ka sngi khaddooh ka wow man ha Aitnar Chyrmang haka 28 tarik uni u bnai.
Kani ka Behdieñkhlam ka Kongwasan Chyrmang haap ko hapoh ka Elaka Jowai wei daw pynman yaka ha ki le sngi nadooh ka 26, 27 wa 28 tarik uni u bnai wei ka bynta wa khaddooh yong ka toh wow noh yaki Rot ki Rong haka 28 tarik.
Kamtæ ynne ka sngi neiliang kiwa yahkhmat ka Seiñ Raij Kongwasan Chyrmang wa kynthup nadooh u Elad Dkhar, President Seiñraij Kongwasan Chyrmang, u Kerlang Lakiang, General Secretary Seiñraij Kongwasan Chyrmang chirup u Dolloi ka Elaka Jowai, u Puramon Kynjing wa u Pator ka Elaka Jowai u Raymond Nartiang da chim ki ka laad wow khut kyntu kyrsu yaki lok ki jor najan najngai wow wan sakhi wan chimbynta lang ha kani ka Behdieñkhlam kawa sdang nyngkong dooh man-u-snem ha Ri-loom Jaiñtia.
U Elad Dkhar, President Seiñraij Kongwasan Chyrmang hawa khut kyntu kyrsu u yaki lok ki jor najan najngai khamtam ki le Langdoh wow chimbynta lang wow sakhi ya kiwa boon ki bynta ka Behdieñkhlam wei yooluti u wa i wan yong ki u man i chngaaiñ wei nang e bor chooh chooh yaka Raij.
U Raymond Nartiang, Pator Elaka Jowai ong u wa kam kiwa kit wa bah yaka niam ka rukom hapoh ki Soo Langdoh Soo Langpung sñiawkmen u wow pyntip cha waroh ki khon ka Niamtre wa em ha ri Khasi wa Jaiñtia heiyatoh wa kani ka Behdieñkhlam kawa sdang nyngkong dooh.
Neiliang u Dolloi ka Elaka Jowai, u Puramon Kynjing won hawa klam ong u ka Behdieñkhlam wow pyndep da u Langdoh Kongwasan Chyrmang toh kawa nyngkong dooh na kiwa em hapoh ka Elaka Jowai kamjooh ka Ri-loom Jaiñtia. Wei man leh ka Behdieñkhlam wow pyndep chwa u hiar rep neibynta u e ngooh e dem yaki Blai ki Syiem yow dap u biang i baam i dih, yow yoh i kyrkhu kyrdoh na waroh ki liang.
Neitæ da pyn-eh-bok pyn-eh-nasib u yaki khon ka Seiñraij Kongwasan Chyrmang ki wow pyndep yaka lehniam khnang yow yoh kyrkhu waroh lang. Wei yooluti u leh wow man ka Behdieñkhlam wa phooh wa pheiñ wei chongkun chongkhia kamwa jooh man haki snem wa dep.
Heiyatoh wa ki bynta waphær waphær yong i pyndep niam nadooh ka 26 tarik hadooh ka 28 tarik won da yoh i batai bniah na u Kerlang Lakiang, General Secretary, Seiñraij Kongwasan Chyrmang.
Discussion about this post