Ka Behdieñkhlam 2024 ka Raij Kongwasan Chyrmang ynne ka sngi da poi ko cha wakut ha Aitnar, Chyrmang, West Jaiñtia Hills heiwa u MLA ka Amlarem, u Lahkmen Rymbui da man u kam u kongsan hei emlang u Dolloi ka Elaka Jowai, u Puramon Kynjing wa kiwi kiwi de.
Kani ka lehniam ka Raij da sdang yaka nadooh ka 16 tarik uni u bnai heiwa da sdang da ka Sdang Khrong Sdang Khri na ki manyung wei nadooh kani ka sngi da sdang leh wow choh yaka bom wei da put leh yaka bhuri.
Da pyndep yaki lehniam waki kñia jar jiar ki sngi kiwa man kam chibynta yong ka Behdieñkhlam kam ka Than Blai, ka Thoh Langdoh Kñia Ryngkaw, Hat Khrong, ka Kamcharoh Blai, ki Chaad Yung Chaad Thyndai, ka Boh Synrum wa kiwi kiwi hadooh wa poi ynne ka sngi wow pynkut ya kani ka lehniam.
Ynne dang step da pyndep yaka Chaad Yung Chaad Thyndai wei da pynbood da i chaad ha Yung Langdoh naka Chyrmang Neiñ wa Chyrmang Wah wa i Sehbhang.
Ha i sngi ki khon ka Raij da wanrah ki yaki 7 tylli Rong ki Rot kiwa da chna nadooh ki sngi wa ki tayaaw wa dadep wei ha Aitnar chirup wa i kieh ki bom, ki bhuri wa bikur heiwa ki khon ka Raij da chaad ki wow pynyoo yei mynsien wa ka’it wa kmen ki.
U Lahkmen Rymbui hawa e yei klam da ong u wa emkaam wow e ngooh ya u Blai Trekirot hapoh i pynlai yong oo wei i lai luti kam ki bru da ye wow pyndep ya kani ka lehniam Behdieñkhlam.
Da ong u leh wa deiwa pyndep yaka lehniam daw yoh i kyrkhu yaki khon ka Raij waroh kawi.
Hadien wa noh yaki Rong ki rot da pyndep leh yaka Yadaw Charoh neitæ won da pyndep yaka Kñia Biadem.
Discussion about this post