U Symbood Montri Rangbah ka jylla, u Prestone Tynsong uwa pait leh yaka chnat PWD (Roads), da ong u wa ka sorkar jylla ym ye ko wow tuklar iyi iyi hajrong i yoh wow kreh da ka Company kawa da chah kyntait haka sorkar wow pynkreh ya u sarok ha Garo Hills.
Da ong wa ka Ministry of Roads Transport ka sorkar pyrdi da tipmit ko ya ar tylli ki Company wow pait yei pynchna sarok kitæ ka National Highways Infrastructure Development Corporation Ltd waka National Highways Authority of India.
Da ong u wa ka sorkar jylla ym ye ko wow leh iyi iyi leh heiyatoh wa yoh Contract da ka Company da chah booh dak yong (Blacklisted) da ka sorkar jylla, katæ ka ARSS Infrastructure Projects Ltd. kawa da yoh Contract wow kreh ya u sarok ha Garo Hills, tangwa i kwah yong ka sorkar toh wa i kaam u lai bait yow ye u pyndep.
Kam wow kdaw heini wa u Vice President ka BJP Meghalaya uwa man leh u MDC na Tura, u Bernard Marak da kylli u yaka sorkar MDA wa yahkhmat da ka NPP hapoh ka jylla hajrong i wym klam ko iyi iyi yei yoh u pynkreh da ka Company wa da chah Blacklist haka sorkar, ka ARSS Infrastructure Projects Ltd kawa da chah Blacklist hapoh ka jylla yei rukom kreh ko ya u sarok Shillong-Dawki.
Da ong u i kreh ya u sarok NH-51 ha Garo Hills toh iwa da yoh Contract yow kreh da ka Manoranjan Company tangwa kani ym ye ko wow pyndep yei kreh heipor wa biang, kamtæ da e noh cha kawi won ka Company wa tip kam ka Shubham tangwa kani ka Company toh kawa pynlai da ka ARSS kawa da chah Blacklist hapoh ka jylla.
Neiliang u Prestone da ong u wa lada u Bernard dang kwah u yei pynche ye u wow yachem waka sorkar jylla wei ye u leh wow yaklam wa ki sahep ka Ministry of Roads Transport.
Da ong u wa yow chna sarokbah da e kti bait haka NHIDCL waka NHAI, wei ym tip wa ka ARSS da chah kyntait næ ym em, wei pynrap u wa nadooh wa khut Tender wei i e poisa da leh da ka sorkar pyrdi wei kam ka sorkar jylla i kaam ko toh wow pynyoh yei thaw chna sarok.
Neiliang u Montri Rangbah ka jylla, u Conrad Sangma leh da ong u i jooh wa ya ini kreh da pynlai da ka NHIDCL deilang waka Ministry of Road Transport & Highways wei i jied yaki Contrator leh da leh da kani ka chnat krehkaam ka sorkar pyrdi.
Discussion about this post