Ka Mawlai SC da ye ko wow ksoh biang yei naam Champion ka Shillong Premier League deiwa jop yaka Rangdajied United FC da 1-0 haka yakhun Final ka SPL 2023 ynne ka sngi.
Ya ka kool wa pynjop da thap da u Donlad Diengdoh haka minit wa 26 haka yalehke wa da pynman ha SSA Stadium, First Ground, Polo, Shillong.
Ka Rangdajied da rem Final biang ko kamwa haka samoi 2022 heiwa da yachem ko leh waka Mawlai hi.
Ka Mawlai kam ka Champion da yoh ko da ka song poisa kawa Rs. 3 lak deilang waka Trophy kawa da e kti da u Chief Secretary ka Meghalaya, u DP Wahlang katwa ka Rangdajied da yoh ko da ka song poisa kawa Rs 1.5 lak kawa da e kti da u Chief Engineer ka State Sports Council Meghalaya, u BM Syiem deiwa emlang leh kiwi kiwa chah khut sñiawbha wa kynthup ya u Meghalaya Football Association President, u H. Dohling, u Shillong Sports Association President, u Eugeneson Lyngdoh wa kiwi de ki heh ka SSA.
U Donlad uwa khlem yoh u yalehke haka Semi Final neidaw wa takha u, da ka kool wa ynne da yoh u wow thap 6 tylli yow yoh wa ar hadien uwa yalehke ka Shillong Lajong, u Deibormame Tongper uwa da thap 8 kool.
Ka samoi 2024 daw sdang ko da ki yalehke ka Fourth Division.
Discussion about this post