Ka Meghalaya Football Association (MFA) da pyndep ko yei pait i sylli namo ka Screening yong ki Zone neibynta wow pynman ha ka sien nyngkong da ka Meghalaya State Youth League.
Kani ka Tournament toh kawa da thrang da slem wow pynman da ka MFA wei daw yabhah ka ha ki ar bynta ki rta kitæ ka U-14 Boys wa U-16 Boys wei ki Zonal Stage daw pynman ha West Garo Hills, West Jaiñtia Hills, West Khasi Hills wa East Khasi Hills deiwa pynman da ka Home & Away wei daw em leh ki Quarter Final, ki Semi Final waka Grand Final yow pynkut ya kani ka Tournament.
Ha kani ka Tournament kawa neibynta waroh kawi ka jylla, ym pynyaleh hapyrdi ki Club tangwa hapyrdi ki District Association heiwa da em 20 tylli kiwa da wan chakhmat yow chimbynta ha kani ka kynti.
I daw wa pynman ya kani ka Tournament yow yow e rynsan ya ki khynroo wow lai ki chkhmat yow mihkmat yaka jylla kamjooh yaka ri.
Kani daw e laad ko leh ya ki khynroo wow ku ki chapoh ki Club yow pynman yaka Meghalaya kam kawa khlan wa pynkhreh ya kiwa yalehbol.
Ya ka Screening da dep pynman da ka MFA ha Garo Hills haka 14 tarik uni u bnai katwa ha kiwi ki Zone da pynman haka 18 tarik.
Ka MFA da pyntip ko wa daw pynbna ya ka tarik wow sdang ha u bnai wow wan wei ki yalehke daw pynman ha ki sngi Saturday yow lait u thut i puræ puthi ka jylla.
Discussion about this post