Ka Jaiñtia National Council (JNC) Central Executive Committee ha ka 25 tarik uni u bnai da yoh ko wow pynskem da u Self Daniel Lyngdoh kam u Adviser wa thymme yong ka seiñ ha ka yalang wa da pynman ha yung krehkaam ka seiñ ha Khliehriat.
Ha katai ka sngi da emlang nadooh u President ka JNC, u Sambormi Lyngdoh, u Wanshwa Suting, General Secretary, u Nangjan Dkhar, Vice President, u Allmiki Ryngkhlem, Asst. Secretary, u Philip J Bamon, Chief Organising Secretary deilang wa kiwi kiwi kiwa yahkhmat ka CEC wa kiwa yahkhmat ki Unit, ki Circle waphær waphær yong ka JNC.
Yei kaam wa kongsan yow pynskem ya u Self Daniel Lyngdoh kam u Adviser wa pura ka JNC, da pyndep da u Sambormi Lyngdoh.
U Sambormi hawa e yei klam da ong u wa u Self Daniel Lyngdoh da man u u bru uwa da heh da san wei kamjooh leh uwa da yaar i bor pyrkhat uwa em leh yei mynsien wow mih chakhmat u kreh neibynta i eh i chon yong ka ri waka jaitbru lyngba ka JNC.
U Self Daniel hawa e yei klam da ong u wa katni da emkaam bha ya i wow ya ksohkti lang wei wow ya kreh deilang khamtam ha kam kini ki sngi wa da roi ki sih khamtam i Drugs wa kiwi de kiwa pynsñihdur ya ka imlang sahlang.
Da klam u leh chaphang ki kattu katni ki phang kiwa ye u ktah ya i, kam i joor wan kiwa na baar kat dang mih ki sngi wei da yooluti wa daw yoh u kreh wei wow pyrkhat ya chiboon ki kaam kiwa daw leh neini chakhmat yow myntoi ka chnong ka thaw, ka thaaiñ waka ri hi waroh kawi.
U Self Daniel Lyngdoh toh uwa na ka chnong Sutnga wei da jooh man u leh kam u waheh chnong ka Sutnga.
Discussion about this post