Wan wai ka Mitali Chandra yei e sikai thaiñ da ki chken ki siej ha Madankynsaw-Mowkyndeng

Ka Women’s Group & Handicraft Multipurpose Cooperative Society Ltd da sdang ko ya ka e sikai thaiñ da ki chken ki siej (Cane & Bamboo Handicraft) kawa dei mynkna kawa yarap poisa da ka Meghalaya State Skill Development Society hapoh ka Skills Meghalaya neibynta ki 30 ngut kiwa na kylleiñ ki chnong ka West Jaiñtia Hills District kawa da pynman ha ka 24 tarik uni u bnai ha CFC, Madankynsaw-Mowkyndeng.

Ya kani ka Skills Training da wan wa u wai ka da ka sahep ka Registrar Cooperative Society, ka Mitali Chandra, IAS, ka sorkar Meghalaya kawa man kam ka kongsan ha kani ka sngi katwa u symbood kongsan toh u B. Warjri, General Manager, District Commerce & Industry Centre, Jowai hei emlang u Lambormi Suchen, Skill Development Officer, MSSDS, West Jaiñtia Hills, u J.M. Paswet, CEO Laskein, Assistant Registrar Cooperative Society, Jowai, u Waheh Chnong ka Madankynsaw-Mowkyndeng, u Bud Rimanki Chympa, u Peter Sutnga, u Chantal Paul Pakma, u Stalbinus Dkhar deilang wa ki dkhot ka Women’s Group & HMPCS Ltd nadooh ka Violet Chympa, President, ka Isabella Pakma, Secretary, ka Jisima Sutnga, Vice President, ka Memory Chympa, Asst. Secretary wa ki para dkhot.

Ya ka yalang wai ya kani ka e sikai da pynlai da u Firstmayborn Ryngkhlem kam u chongknor wei da pdiang burom ya waroh kiwa da emlang nadooh ki sahep sorkar heijooh i por ya kiwa wan chah sikai da u waheh chnong.

Neiliang u Lambormi Suchen da klam u chaphang ki laad ki kabu hapoh ka Skills Meghalaya kawa yarap ya kiwa chong chnong heijooh i por da pynchlur u leh ya kiwa chah sikai u minot ki khnang wa kani ka kabu u pynmyntoi ko ya ki u kamai kajih ki.

Related posts

Da jied ya u Robert Francis Prevost kam u Pope wa thymme

May 8, 2025

Pynkhreh ka sorkar wym duna baam ha Meghalaya lada toh joor ka thma

May 8, 2025

U B. Warjri won da khana u ya ki laad yarap wa ka yung krehkaam yong oo da e ko ya kiwa chah sikai, wei lada emkaam ki iwon iwon neiliang yong oo u e yarap ko chispah hapoh chispah.

Ka kongsan da klam ko chaphang wow kyntu ya ki kynthai deiwa ong wow minot hok ki ya kani ka kabu neibynta i myntoi ya idæ hi, khnang wa kam ki kynthai lada ye ki u kreh chitom, ka yung leh ye u manbha ko.

Heijooh i por leh da kyntu ko wow seiñ ya ki Cooperative Society kam i ya krehlang yow nang ku chooh chooh ka kamai. Da e nongmuna ko ya kiwa chah sikai wow bood yei luti ka Isabella Pakma kam wow pynchlur ya ki. Hadien i klam da wai pyrda ko ya ka kamra wow e sikai wa ki thaw sah.

Hadien ini da yoh ya ki kyntien sñiawngooh na ki sahep wa kiwa chah khut sñiawbha.