Hapyrdi u slap wa joor khlem swe khlem randien, ynne i step ka seiñ “Khooid Ya Ka Wah Myntdu” da li tia ko hakhmat ka yung krehkaam u DC ka West Jaiñtia Hills District yow dawa pynkhooid ya u chyiap wei khyndaw wa da pynkai pyrchah aiñ cha ka wah Myntdu daka M/S Dhar Construction Company neibhah kani toh ka daw wa hakhmat dooh wa pynkylla umktieh ya ka Wah Myntdu heiwa ki paidbah wa chaniah umbaam umdih na ka maad ki yei saja.
Kani ka seiñ hapoh i yahkhmat u K.L. Pariat kam u President, nadooh i por 10:00 waje dapoi ki ha pchem ka yung krehkaam u DC deilang wa ki Placard wa da thoh yei kyntien dawa naka sorkar u pynkhooid smat ya u chyiap i khyndaw wa da pynkai hapoh wah Myntdu wei wow pynchitom ya ka M/S Dhar Construction Company katkam ka aiñ hajrong i emkti yong ka u pynyap ya ka Wah Myntdu kawa psa umbaam umdih ya u paidbah.
Da kyrpaad ki leh ya u Chief Justice ka Meghalaya High Court wow chimkhia u hajrong ini i chah pyntngit ka Myntdu wei ong ki leh ka um waka la’ær toh i emkaam wa hakhmat dooh yong u bru wei kam ki paidbah wym kot i bor ki wow thied bait da ki umdih wa da song.
Hadien chipor wa da yieñ ki ha pchem, da mih ki Magistrate wow beh ya ki na ini i thaw deiwa e daw wym toh i rukom wow tia ha DC tang wow lai ki ha iwi won i thaw cha baar ka yung krehkaam u DC. Kamtæ ki dkhot kani ka seiñ leh da yut li yieñ won ki harood sarok marjan ka thaw psiah cha yung krehkaam u DC.
Ki manbei ka chnong Jowai hawa pynsñiaw yei chem yong ki heiyatoh wa ka um wa wan na Myntdu, ong haroh ki wym ye chah de ki yei man i long ka Myntdu neibhah ye ko u wanrah i kjut wa boon jait.
Neiliang u K.L.Pariat ong u i pynmih kyndon 144 CrPC u DC ini wa dep man kamwa pynbiej donhi u yeiwa jooh leh, neibhah ha u snem 2021 leh heipor wa em i tooid khyndaw cha Myntdu nei chna pynheh ya u sarok Jowai-Amlarem, kani hi ka jooh ka kyndon pynmih u kam chibynta ka hukum NGT.
Da booh yukylli haroh u ya u DC, ya ka chnat PWD wei ileh wym em kem næ pynchitom ya u Contractor wa emkti u pynsih ya kani ka um, kamjooh da kyntu ya u Montri Rangbah wow leh u iyi re iyi heiyatoh i chah ktah ki um ki wah ha Ri-loom Jaiñtia kamwa jooh klam u hajrong wow e yada ya ki um ki wah.
Heiyatoh wa i pynkreh ya uni u sarok hei dor Tender wa Rs. 90 klur, u K.L. Pariat ong u wa katkam i yoo yong ki kani ka surok wym em ware emkaam ko hadooh kattæ kattæ tangwa man pathan ko kawa pynjæd pynsih.
Heijooh i por phylla ki wa kammon katæ ka Ministry of Road Transport & Highway ka sorkar India u e laad ko wow chna ya uni u sarok uwa du 20 Meter naka Wah Myntdu weiwa e laad ko u noh khyndaw hapoh wah.
Wa hei sakhiat hawa pynkreh ya u sarok katkam ka Tender daw em bait ki kyndon wa kynthup nadooh ki aiñ yong ka Environment, ki aiñ ka Water Policy wa u Contractor ym ye u wow lai lait. Kani pynyoo wot ha wym pu em yoh ki ya ka Environment Clearance leh da pynkreh bait ki ya uni u sarok.
Kamtæ kyntu u ya ki paidbah kamjooh ka sorkar wow khyrngiat noh ym wow e laad ya kiwa kreh pyrchah aiñ du yow myntoi ki Contractor, ka sorkar, ki Minister, ki Engineer tangwa toh u mih chakhmat neibhah daw poi chei por wym ye de u leh iyi iyi.
Discussion about this post