Ka Committee on Government Assurances kawa em hapoh ka Meghalaya Legislative Assembly, hei yahkhmat yong u Chairman, u Renikton Lyngdoh Tongkhar deilang wa ki dkhot wa kyntup ya u Gabriel Wahlang, MLA wa u Matthew B Kurbah, MLA da hiar lai pait ki ya ka Mawmluh Cherra Cements Limited (MCCL) wa em ha Sohra ha ka 29 tarik uni u bnai.
Ka Committee da yaklam ko wa ki heh wa pait ya kani ka karkhana ka sorkar kawa da pyrkhat yow khang noh ka heiwa da ya phyllu ya iyi wa ye u leh deiwa emlang ka Managing Director ka MCCL, ka W.A.M. Booth, u Chief General Manager ka MCCL, u K. Lyngdoh deilang wa kiwi de.
U Renikton da pynsñiaw u yei wym yoo em kyrmen de u pynkhai im ya kani ka karkhana na ki daw wa boon kamjooh leh wow pynkrehkaam ka leh man iwa sy’at bha.
Tangwa ki dkhot ka Committee da mynjur ki wow tyrwa cha ka sorkar wow pynkylla ya kani ka karkhana cha ka Museum wei ki thaw sah namo ki Quarter ka MCCL won u pynman ki kam ka Resort, deiwa pyrkhat leh wow e kti u pynlai ya kani ka Resort kamjooh ka Museum da kiwa kreh kani ka karkhana hi.
U Renikton da ong u wa deiwa pynkylla ya kani ka karkhana kam ka thaw uiñke suwari daw man pathan ko wow pynmih poisa neibhah kani ka thaw man ko kawa miat kamjooh ka karkhana leh toh kawa dang chkeh dang skem wei ki thaw sah leh man ki kiwa miat wei u tympra ki daw man iwa sepai.
Neiliang u Matthew B Kurbah da khana u yeiwa man yajan bha u wa ka MCCL ha ki snem 1999-2000 wei man iwa sñiawsih wow khang noh ya kani ka karkhana neibhah daw em boon kiwa dooh kreh, kamtæ da mynjur u yeini wa da tyrwa yow pynkylla noh ya kani ka karkhana cha ka Museum yow pynneh pynsah ka wei kiwa kreh yow ye ki u pynlai ya kani ka thaw.
U Gabriel Wahlang leh da pynsñiaw u yei sñiawsih yow khang ya kani ka karkhana ka sorkar wei da kyrmen u wa ka sorkar daw wanrah ko ka laad yarap ya kiwa kreh kani ka MCCL lada khang noh ya ka.
Discussion about this post