Ka All Jaiñtia Muster Roll Workers & Labour Union (CEC) HQ: Jowai, kamwa da jooh thung dieñ ko ha man ka World Environment Day ha ki chnong ha Ri Jaiñtia, ha kani ka 5 tarik leh da thung dieñ ko ha Myntdu Wah Sahkti, iwa man i thaw wa daw riñ um ka PHE cha ki yung ka chnong Mihmyntdu.
Da thung ya kini ki dieñ ha katai ka thaw yow nang ye u pynneh pynbha chooh chooh ya ka khlieh ka rood ka Myntdu ha Mihmyntdu.
Da thung kamwa 40 tylli donhi ki tre dieñ khnang yow ye u sumaar u pynheh, kam ki jait dieñ Sniñ, ki Salangdoh wa kiwi ki jait dieñ.
Ya kani ka thung dieñ da yakrehlang chirup wa u A. Phawa, waheh chnong ka Mihmyntdu, ka yung krehkaam u DFO (Social forestry), ka yung krehkaam u SDO PHE (E) WJHD, ki wakreh Muster Roll, ki Cook cum Helpers, ka President wa ki dkhot yong ka Ïatreilang VO ka chnong Mihmyntdu, u Jerry A Suting, President wa ki dkhot ka All Jaiñtia MDM Workers Union, Jowai deilang wa ka Khooid Ya Ka Wah Myntdu.
Ya kani ka ya thung dieñ daw pteiñ da kiwa kreh Muster Roll wa ki Cook cum Helpers ha chnong Sutnga wa daw thung ha ka skur ka Seiñraij Khliehriat neitæ daw thung da kiwi ki chnat krehkaam ka seiñ ha Ri-loom Jaiñtia.
Hachwa u sdang ka thung dieñ da yoh i klam na u Roskil Challam SDO PHE (E) Jowai, uwa da kyntu ya waroh kiwa chong chnong yow sumaar hadooh wa da heh ki dieñ kiwa da dep thung ki khnang yow yoh i ya ka la’er kawa pyngngaad, ka um kawa khooid, u ri u sumaar i ya ka bei ramaw ka mariang kawa pynim pynbiang ya i ki bru.
Da yoh leh ya i klam na u K.L. Pariat, Adviser ka seiñ wa u President ka Khooid Ya Ka Wah Myntdu, uwa da kyntu ya ka sorkar jylla wa ymtoh u chna donhi ko ya ki sarok wa kiwi tawon ki chna wa emkaam u paidbah, tangwa u thung dieñ, u pynbha ko ya kitu ki rood yong ki thaw wa dadep khloh da dep noh ko. Ymtoh u kut du hei su ya ka bai khyndaw cha ki tre thaw wa ka bai kreh u Contractor, toh u em i kitkhlieh wa u pynbha chooh chooh ya ka bei ramaw ka mariang.
Heijooh i por da kyntu ya kiwa sikai skur wow pynchlur ya ki khynnah u thung dieñ ki wei wow pait hadooh wa heh ki dieñ wa dadep thung ki, ymtoh u man dieñ thang din won ki yow chet ja ha skur ya ki khynnah.
Kamtæ, da kyrpaad u ya ki Head Teacher, ki SMC yow lehbha da iwa khian tam ya i manbru longbru wa ya ka bei ramaw deiwa thied da ki LPG Stove wei wow pynbiang umkor sorkar ha ki thaw chet ja ha skur PM-POSHAN wei deiwa leh kamni daw e ko ya i chait i khiah ya kiwa chet ja ha skur wa ya ka chnong ka ri waroh kawi.
Discussion about this post