Ka Meghalaya State Disaster Management Authority (MSDMA) da pyntip ko wa i wan u slap wa wanrah da ka South West Monsoon nadooh ka 10 tarik uni u bnai wei katkam wa da chim yukheiñ hadooh ka 17 tarik da em 42 tylli ki chnong kiwa chah ktah, kiwa chong chnong won 3037 ngut, ki yung ki sem kiwa da chah tymprai phrai da em ki 18 tylli, ki bru wa dooh yei mynsien da em ki 2 ngut.
Kiwa khlaad toh uwa tip kam u Probino Warbah uwa 48 snem i rta uwa na Tynring, East Khasi Hills uwa da ngam um ha ka 7 tarik uni u bnai heiwa da chem yei metyap u ha ka 10 tarik ha ka wah Umrynjah kawa dang haap hapoh ka Mawlai C&RD Block.
U Kantly Maram uwa 49 snem i rta uwa na chnong Nongkroh Rambrai wa em hapoh ka Nongstoin Block ka West Khasi Hills da khlaad u ha ka 12 tarik neidaw wa chah thlieh pyrthat.
Ki chnong wa boon dooh wa chah ktah toh ka West Garo Hills kiwa em 24 tylli heiwa ki paidbah wa chah ktah da em ki 2825 ngut wei da pynbood da ka South West Khasi Hills wa em 11 tylli ki chnong wa chah ktah, ka West Khasi Hills 3 tylli, ka Eastern West Khasi Hills ar tylli, wa mar iwi ha East Khasi Hills wa East Jaiñtia Hills.
Discussion about this post