Ka Jaiñtia National Council (JNC) ha ka kyrwoh na u Publicity Secretary, u Mebanteilang Sukhlaiñ da pynsñiaw ko wa katwon i sñiawkhia hajrong i chah ktah kiwa chong chnong ka thaaiñ Narpuh neibhah u sarok NH-6 toh uwa da jæd da pra cha wa palat katwa dang mih ki sngi, najrong i joor slap wa katni.
Ka seiñ pynsñiaw ko leh wa katwon da ktah ya i lai i wan khamtam ki pli ki khynnah skur, kiwa mylla sngi, ki pli wa kjut wa kiwi wei sa katwon ki paidbah ka thaaiñ u maad ki yeini.
Kam wow pynkynmoo wa ha u snem wa dadep ka seiñ da phah ujor ko chadooh ka Ministry of Road Transport and Highway (MoRTH) ka sorkar bei heiwa ka Ministry leh da jubab ko wa da phah ya ka NHAI wow leh ko yei kaam deiwa thung Contractor noh wow chna, wei neiliang ka NHAI leh da jubab ko wa da thung ko daka M/s SL Infra wow pynchna noh ya u sarokbah nadooh na Lumshnong chadooh Ratacherra deilang waka MR Construction, tang ini waroh sñiawsih wym em jia i hadooh katni, yoosar em iyi re iyi cha kylla.
Ka seiñ booh ko leh yei kylli cheiwon wiar ka District Mineral Foundation DMF kawa pait yei eh i chon ki thaw wa chah ktah nei tih moochuni na ki karkhana waphær waphær. Ka seiñ da kylli ko leh wa lada na ka DMF da ye wow chna sarok cha kiwi ki thaw wym toh kiwa chah ktah, iyi wow eh wow pynchna noh ya uni u sarok wa em ha kini ki thaw wa chah ktah sakhiat?
Ini i leh ka sorkar da man ko iwa da palat pood wei daw poi leh i por wa ki paidbah daw paan yukheiñ ki na ka katkam i leh ko.
Neiliang ka seiñ e ko i kyrchaan wa pura ya ka JAC hei yakhih khang sarok wa khlem booh por wei ka seiñ leh da phah ko ya ki dkhot yong ka wow ya emlang ki chirup wa kiwa chong chnong ka thaaiñ Narpuh mynstep ka sngi wow e bor e mynsieñ ya ini i eh i kthang wa chem ki.
Ka seiñ u emlang ko chirup chirup hadooh u man i yakhih iwa jop. Wei neiliang ka seiñ leh ym chong kli kti ko wei daw thooh ko i laad i luti katwa chah i bor neibynta uni u sarok.
Discussion about this post