Ka Soil and Water Conservation Beat Office wa thymme wa em ha chnong Laskein da wai yaka ynne yow yarap pynkrehkaam ya ki kaam pynneh pynsah ya ka ramaw neibynta ki 47 tylli ki chnong wa em hapoh ka Elaka Raliang.
Ya kani ka Beat Office da wan wai da u Montri ka chnat Soil and Water Conservation, u Marcuise N. Marak kawa tip pyrtuid kam ka Laskein Soil & Water Conservation Beat Office kawa em hapoh ka Laskein C&RD Block, West Jaiñtia Hills deiwa sakhi lang u MLA ka thaaiñ, u Nujorki Sungoh, ka Director ka Soil & Water Conservation Department, ka Ibashisha Rynjah wa u Divisional Soil and Water Conservation Officer Jowai Territorial Division, u Taiwanyoo War.
Ya kani ka Beat Office da chna ha i thaw wa heh 1,06,430 sqft kawa da e sñiawbha da ka Laskein Dorbar Chnong.
Neiliang u Marcuise hawa e yei klam da ong u wa kani ka Beat Office daw pynmyntoi bha ko ya ki paidbah neini chakhmat neibhah kini ki 47 chnong ym hap de ki wow lai cha jngai yow yoh yarap.
Da ong u leh wa u man ko kam ka chlem e sikai e stat yow sñiawthooh ya kiwa boon ki Scheme pynroi wei ym hap de ki u lai cha Shangpung Range Office ka Soil and Water Conservation yeiwa emkaam ki.
Da e khublei u leh ya ka Dorbar Chnong Laskein yei sbun ko wow e ya ini i thaw iwa daw pynmyntoi ya waroh.
Ha kani ka sngi da pynman leh yei thung dieñ.
Kiwi de kiwa da emlang ha kani ka sngi toh u Additional Deputy Commissioner ka West Jaiñtia Hills, u M.B. Tongper, ki sahep ka Soil & Water Conservation, u waheh chnong, u Pynbeitlang Lyngdoh, u Dolloi ka Elaka Raliang, u Chawas Lyngdoh wa kiwi de kiwa chah khut sñiawbha.
Ya ka yalang da pynman da ka yung krehkaam u Divisional Soil & Water Conservation Officer Jowai Territorial Division, West Jaiñtia Hills.
Discussion about this post