Ha ka 21 tarik uni u bnai ha ka yalang pynkup burom ka North Liberty Higher Secondary School Jowai ya ki khynroo khyllood wa lai puræ yong ka kiwa da pyndep ya ka SSLC wa HSSLC yong u snem 2024, neiliang u Director Administration, MBOSE Shillong u Mackdonal Marbaniang uwa da wan sakhi kam u kongsan hawa e yei klam ong u, ka West Jaiñtia Hills District toh kawi na ki District hapoh ka jylla kawa wan hakhmat dooh hei puræ puthi neibhah man-u-snem ka Pass Percentage ha ka SSLC wa HSSLC da palat bait ki ya ka 80-85%.
Kamtæ da ong u wa ini pynyoo ko wa ka West Jaiñtia Hills toh kawa chimkhia u pynku yei puræ puthi, wei na kani ka District da yoo leh yei mih chiboon ki bru wa stat wa chemphang weiwa emburom haki laiñ waphær waphær.
Ong haroh u wa ka skur North Liberty toh kawi na ki skur wa rah naam rah burom ya ka West Jaiñtia Hills neibhah man-u-snem ym jooh dooh ko u psiah haka thup Top-10 wa Top-20 yong ka Result MBOSE ka jylla. Wei ha uni u snem leh da yoo biang wa ha ka Result HSSLC Science Stream da em ar ngut wa uwi haka Arts Stream, deiwa pynrap u wym toh iwa suk u poi ha kani ka kyrdan næ wow yakhun wa kiwi won ki skur wa em ha Shillong wa kiwi won ki thaw.
Yooluti u leh wa kani ka skur North Liberty daw ye ko u pynmih ki bru emburom ha ki bynta waphær waphær.
Heijooh i por ban joor u ya kiwa sikai, ki khynnah skur wow man kiwa thooh yei stat i tip khnang yow ku i manbru neibhah man-u-snem nang mih ki buit ki stat wa thymme.
Da yoh leh i klam na ka symbood kongsan, ka C. Lyngdoh, Sub Inspector of School Jowai, u B. Richard Uriah, Principal ka North Liberty Higher Secondary School, i klam na ki khynroo khyllood wa dapoi chakhmat ha ka Result SSLC, HSSLC yong ka Science wa Arts Stream wa kiwi ha ka yalang wa pynlai daka Deigratia Syngkrem.
Da pynchongchit chooh chooh ya kani ka sngi da i chaad i rwai wa da chimbynta da ki khynnah skur.
Discussion about this post