Ka Jaiñtia National Council (JNC) ha ka kyrwoh na u President, u Sambormi Lyngdoh da pynsñiaw u yei sñiawsih wa joor hajrong iwa jia ha chnong Kuliang, East Jaiñtia Hills District hawa kawi ka manyung da maad ko yei chah leh embor ha ki BSF hei miet ka 19 tarik uni u bnai wei hadooh kattæ leh ym pu kem ya ki.
U Sambormi Lyngdoh hawa e yei klam da ong u wa hei sakhiat ka sorkar India hawa booh ko ya kawon kawon ka ktem BSF toh wow pait bait neibynta u pood wei wow khlang laad yei wan prong tooh i baar ri, tangwa hei sakhi wa katni da yo wa ym em man kamwa toh u man.
“I booh i yei yukylli wa lada ki baar ri na Bangladesh yoh ki wow poi tooh chapoh u pood yong i tæ ymtoh mo i kaamram næ i bahkhlieh yong ki BSF? Sa iwi leh lada em kiwa psiah tooh chapoh chnong poh thaw tæ ye mo ki BSF wow lai kem? Itæ leh hei miet. Neiliang yong i ong i ini toh i tlot yong ki BSF wa yoh ki bru na baar wow psiah,” da ong u President ka JNC.
Chooh chooh da ong wa phylla leh wa kammon ki BSF lai psiah ki chapoh chnong khlem da synran lang ki pulit næ ki waheh chnong, wei sñiaw phylla leh wa da kam ki ya idæ ki kam ki “On Duty” tangwa dei riam yung (Civil Dress). Katkam ka aiñ lada em kawon kawon ka kaam wa pyrchah ya uwon uwon heiyatoh wa ki kam khappood toh u pyntip chwa ki cha ki pulit næ cha ki bru ka Infiltration kiwa toh u pait yeiwa emkaam, tangwa ym em leh ki yeini, najrong wa lai psiah yabor wei klam sih chirup wa ki tiar pynmynsoo. Wei embhah pathan wym jia ya ki iwon iwon wa sñiawsih neibhah khlem Uniform yi wow tip wa kiyi kitai.
I kaam yong ki BSF toh wow yada tangwa da man pathan kam ki deiñkah ya ki paidbah, wei hadooh katni leh ym jooh yoo wa kem bru ki da kiwa na baar ki, da jooh yoo du wow siat ya kiwa chong chnong, u pynthut yei lai i wan ki bru wei wow kynreh katwa ngait wot ya ki khynnah kynthai.
U Sambormi da kyntu joor u leh ya katu ka yung wa chah ktah wym toh wym hoi u ngait ki hei ktien buit ki BSF wow pyndam noh ya ka ujor, toh u lai bait chakhmat wow yoh yei bichaar hok.
Neiliang ka seiñ leh ym chong klikti ko wei dadep yachem ko leh wa u SP ka East Jaiñtia Hills District wei da khana u leh wa da chim yei takit wa sakhiat wei dang lai ko leh chakhmat deiwa e kti ha u DSP yong ka Crime, weiwa ya kitu kiwa emkti leh da pynngat yaki haka aiñ POCSO.
U President ka JNC da ban joor u ya ki bor yong ka aiñ khamtam ya ki pulit wym toh u ieh jem ki, toh u kem ki wut-wut wei wow leh ki leh deiwa khor khlem da leh chiliang khmat, neibhah ka aiñ man ko salonsar ya uwon uwon.
“Ka kyrwoh kawa che phah i cha ka sorkar wa lada ym ye u leh yeiwa emkaam wow kem ya ki BSF tæ daw poi i por wa ka seiñ wa ki paidbah hi waroh ka thaaiñ daw chim ki da ka laad ka luti wa khor han lada ktah ko wot yaka imlang ka sahlang leh neibhah ym ye de wow chah ya kam ini i jait jia pyn ha i thaw yong i,” ong u Sambormi Lyngdoh.
Discussion about this post