Ha kini ki sngi wa dep, uwi u khynroo uwa na Nagaland da yoh yaroh bha u hadien wa em wa pynpoor ya kawi ka Certificate kawa da kam toh kawa na ka Indian Space Research Organisation (ISRO) kawa da e yei sñiawngooh ya u Dr. Belenso T. Yimchunger deiwa ong wa da leh u yei kaam wa khroo yow yarap pynchna ya ka ‘Pushpak’ kamwa man ka Reusable Launch Vehicle (RLV) kawa da chna yow hær cha haw-haw wei kawa ye u wan biang cha Pyrthai yow pynemkaam biang ka.
Ya kani ka lieñsuiñ da dep wow pynhær ka la le sieñ deiwa khlem em bru hapoh wei da ye ko wow hiar biang dei bor yong ka hi.
U Dr. Belenso da yoh yaroh u nadooh u Montri ka chnat PHE ka Nagaland kamjooh kiwa boon kiwi kiwa da ngait ya i dur ka chithi wa da pynpoor ha ki rynsan Social Media.
Tangwa da em kiwa thoh khubor kiwa da lai kylli na ka ISRO ya kani ka chithi heiwa ka ISRO da ong ko wym em e ko kam kani ka chithi hadien wa em boon ki laad pathai khubor kiwa da pynmih ya ka khubor chaphang u Dr. Belenso wa kammon kam u khon uwa kreh bordiñ dapoi u chadooh kani ka kyrdan.
U Dr. Belenso toh uwa bna naam hei stat u wow chna ya kiwa boon ki jait kaam heiwa da mih khubor u deiwa chna u ya ka Pungro Power Soil heiwa da ye u wow pynmih bordiñ nei khyndaw wei hadien ini kamwa 3-4 bnai nachwa da em wa thoh cha oo lyngba ka email wa kam wa ki toh kiwa na ISRO heiwa da paan yarap ki ya oo yow kreh ha ka RLV heiwa oo da jubab wei pha u cha ki chaphang i kreh wa da leh u wei hadien kattu katni tayaaw da yoh u ya ka chithi kawa poor katni, wei kattæ da tip u toh kawa da chna thok hi-eh ki bru deiwa em wa leh kyndeh wow paan yarap na oo.
Ka ISRO won da ong ko wa ym tip ki wa embynta u wow pynandur ya u Pushpak wei lada em iwa kreh u hap u wow pynyoo iyi wa leh u.
Chooh chooh u Dr. Belenso ymtoh uwa da pyndep ya ka Ph.D tangwa da yoh u kam ka Honorary Doctorate donhi.
Discussion about this post