Ar ngut kiwa jop MP napoh patok wa kynthup ya u Amritpal Singh na Khadoor Sahib (Punjab) wa u Abdul Rashid Sheikh na Baramullah (Jammu and Kashmir), da pynlait ya ki napoh patok chipor du neibynta wow lai chim smai ki kam ki dkhot ka Lok Sabha ynnin ka sngi deiwa em boon ki bru ka aiñ ha soodong ka Parliament.
U Rashid uwa khut siñ kam u Engineer Rashid toh uwa chah kset ha Tihar Jail, Delhi neidaw wa emkti u ha ki kaam wow yarap poisa ya ki Terrorist ha Kashmir wei da chah pynngat u hapoh ka aiñ Unlawful Activities (Prevention) Act, katwa u Amritpal Singh won toh uwa da chah kset hapoh ka Dibrugarh Jail ka Assam uwa da chah kem hapoh ka aiñ National Security Act neidaw wa yakhih u pyrchah ya ka ri India.
Kini ar ngut da jop ki kam ki kyrtong samen wei da yoh ki wow chim smai hapoh ka kamra krehkaam u Speaker ka Lok Sabha.
Ya u Rashid da e laad wow mih u napoh patok ar kynta khlem da kheiñ yei por wa chimpor wow lai u na Tihar Jail cha Parliament katwa ya u Sing da pynlait ya oo napoh patok soo sngi nadooh ka 5 tarik uni u bnai yow lai u na Assam cha Delhi wei yow wanrah biang oo cha Assam.
Ka hukum wow pynlait ya ki wa tip kam ka Parole da ong wa ha kini ki por ymtoh u klam ki wa kiwa thoh khubor kamjooh kiwa ha-yung ha-sem ki leh ymtoh wow yaklam ki wa kiwon kiwon ki laad pathai khubor.
U Amritpal Singh uwa man kam uwa yaleh yow yoh ya ka ri Khalistan da chah wow yachem u wa kiwa ha-yung ha-sem u ha Delhi katwa ya u Rashid da chah donhi ya kiwa ha-yung ha-sem u wow wan ki cha ka chim smai.
U Rashid toh uwa da em hapoh patok nadooh u 2019 hadien wa chah kem u ha u 2017 katwa u Singh won da chah kset u nadooh u April 2023 hadien wa psiah yabor u hapoh ka Police Station dei thmu wow pynlait ya uwi na kiwa ya krehlang wa oo uwa chah kset.
Hadien ini da lai rah biang ki chapoh patok.
Puræ leh: Jop MP ki 3 ngut kiwa yaleh laitlooid na ka India, 2 ngut toh kiwa em hapoh Jail
Discussion about this post