Ynne ka sngi ka Delimitation Committee yong i phiah ya ki MDC Constituency ka JHADC da pynman ko ya ka Public Hearing namo ka pynsñiaw paidbah neibynta ki 3 Constituency kitæ ka War East, ka War West wa ka War Central.
Ya kani ka pynsñiaw paidbah da pynman ha Syiem Jingsuk Parish Hall, Amlarem, West Jaintia Hills District.
Ha ini i pynsñiaw paidbah neiliang u Waheh Chnong ka Pdengkarong, u Kolmen Pohshna da kyrpaad u wa katkam i man i sur u paidbah na Pdengkarong, Amsyrwai wa ka Amralang toh wow em biang ha ka War East Constituency.
U P. Pakynteiñ na Pdengshakap da pynsñiaw u wa ym kwah u wow pyrchah ya iwon iwon tangwa da e yumut u wow wanrah ya ki le chnong wa kynthup ya ka Pdengshakap, Satpator wa ka Trangblang yow em ki chirup kamwa em hi ki ha ka jooh ka Elaka ka Satpator.
Na Umladkhur, u Emlangki Dkhar da kyrpaad u wow kynthup biang ya ka chnong hapoh ka Jowai South kamwa jooh man hi nachwa.
U Dapoi Lyngdoh, Waheh Chnong ka Umladkhur da kyrpaad u wow man kamwa jooh hi wow neh ha ka Jowai South.
U Donbok Lamurong na ka Chnong Thangbuli da kwah u wow neh biang hapoh ka Jowai South kam ha ki por wa dadep.
U D. Tariang na Thangbuli da paan bor wow thoh cha ka Committee hapoh ka 19 tarik neibhah nachwa jooh em ko hapoh ka Jowai South.
Neiliang u J. Bareh na Umladkhur da kyrpaad u ya ka Committee wow pynskem chisiendon wei yow lait u pynchaad ya ka chnong na kawi ka Constituency cha kawi kam ha ki por wa dadep.
U A. Khonglah, Asst. Waheh Chnong ka Bakur da dawa u wow neh cha ka War West neibhah wa daw chem chitom lada psiah ko cha ka War Central.
U Kampher Pohlong uwa man u Waheh Chnong ka Amlarem da pachat yumut u wow chim yei sñiaw yong ki chnong wa da chah phiah chah kyrriah chnong.
Ka Delimitation Committee da kyrpaad ko leh wow thoh cha ka Committee hapoh 3:00 waje i sngi ka 19 tarik uni u bnai lada em iwon iwon iwa kwah ki paidbah wow pynsñiaw heiyatoh wa i phiah ya ki Constituency.
Da pynkut ya i pynsñiaw paidbah da ki kyntien khublei na u P. Shylla, Secretary ka Committee.
Discussion about this post