Dawa ka Dorbar Ki Waheh Kur Ri Jaiñtia wow tipmit noh ka JHADC ya ki Waheh Kur

Ka Dorbar Ki Waheh Kur Ri Jaiñtia ha i yahkhmat u Khroo L Pariat kam u President, u Gremlin Bareh, Asst. General Secretary wa u Nathan Pale, dkhot Executive Dorbar wa kiwi ki dkhot, ha ka 11 tarik da lai e ki dei thoh ha kti u Thombor Shiwat, CEM chirup wa i emlang ki EM yong oo yow dawa yada ya ka dustur riti kamjooh wow tipmit leh ya ki Waheh Kur.

Da ong wa kam ki jaitbru Pnar wa kiwi de wa em hapoh ka JHADC, da emkaam wow yada ya ka dustur riti yong ki wa chim jait na ka bei wei yow leh yeini da emkaam wow tipmit noh ya ki Dorbar Kur yong kiwa boon seiñ kur.

Deiwa tipmit wei pynkupbor ya ki Waheh Kur wow e ki nadooh ki Kur/Clan Certificate, daw pynman noh ya kani ka Certificate kawa emkaam u rah hawa paan Birth Certificate, Death Certificate wei hadooh ka ST Certificate.

Da ini daw pyntikna wym em kiwa ye u pynemkaam bakla yei kur i jait, kamjooh leh da tikna wei pynskem ya ka dustur riti neibhah ym ye wow chim jait chim kur khlem da bood ya ka dustur riti wa toh u chim dei yong ka bei.

Related posts

Sangeh noh yei e License cha kiwa na baar, dawa ka CoMSO na u CEM

May 9, 2025

Dang du 2 Km donhi wa dadep kær ya ki thaw khappood ka Amlarem Constituency: Lahkmen

May 9, 2025

Kamtæ da ong wa ka JHADC da emkaam ko wow wanrah ka rai yow pynkupbor ya ini katkam ka aiñ khnang yow ye noh u tipmit leh ya ki Dorbar Kur wei wow pynkupbor leh ya ki Waheh Kur u e ki ya kani ka Clan Certificate ka wow man ka wym hoi u dam u em hawa yaleh ST Certificate.  

Neiliang u CEM da khana u wa ka EC ka yong oo da pynkhreh bha ko yow wanrah da ka Bill wow tipmit ya ki Kur kiwa hiar na ka jait bei.

Katwa neiliang ka Dorbar Ki Waheh Kur Ri Jaiñtia da pynsñiaw ko wa kat wym pu em ka aiñ ye wow pynmih da ka Executive Order katkam wa chah ki kaiñ ka Council yow smat u tipmit ya ki Kur.