Ka Discretionary Grant kawa Rs. 10 lak wa yoh ki MLA ymtoh yow leh sñiawbha ki: Sanbor

Ki 60 ngut ki MLA ka Meghalaya da yoh mar Rs. 10 lak kam ka Discretionary Grant wei kani ka Grant toh kawa da mang ya ki MLA wow e yarap kyrpang ya ki bru kiwa emkaam yarap wei man hok sakhiat wow yoh lada jia iwon iwon.

Hawa klam wa kiwa thoh khubor ynne ka sngi, u MLA ka South Shillong u Sanbor Shullai da ong u wa u MLA ymtoh u thap u ya kani ka Grant chapoh kata næ wow e cha ki kurim, ki khon tangwa toh u wow e bait cha ki paidbah kiwa emkaam hok.

“Ki MLA ym ye ki khlem yarap ya ki bru na kani ka Grant kawa da e Rs. 10 lak, neibhah da thoh che ha ka kyndon wa toh u e cha ki paidbah, ymtoh wow thap cha u kata u MLA, cha ki kurim, ki khon yow yaleh sñiawbha”, da ong u Sanbor.

Hawa ther ta kiwi ki MLA ki wym yarap ya ki paidbah, u Sanbor da ong u wa kitu kiwa baam ya kani daw yoh ki yei su kylliang wa lehbeiñ ki ya kiwa dooh wa duk wa kiwa jinjar.

Related posts

Heipor tlang wa duna um ym ye u leh iyi iyi: Marcuise N Marak

November 26, 2024

Khut ka UDP-West Jaiñtia Hills ya kiwa kwah u yaleh MDC cha ka JHADC

November 25, 2024

Da ong u wa i thmu yong kani ka Grant kawa da e cha waroh ki MLA toh neibynta ki MLA wow e yarap ya ki bru wa kjut wa chitom, ha ka yap ka im wa kiwa dooh wa jinjar yow pyndap ha ka bai kot bai sla, næ bai dawai. “Kitu ki MLA ki wym kwah wow pynemkaam ya kani ka Grant yow yarap ya ki bru, toh wow thoh ki cha ka Secretariat yong ka Assembly”, da ong u Sanbor.

Da khana u leh wa ka sorkar da pynku ko ya kani ka Grant man-i-por katkam wa lai i por.

Ha u snem 2008, ka sorkar da e ko du Rs. 3 lak wei rap hadien da pynheh cha ka Rs. 5 lak wei kattæ dapoi cha ka Rs. 10 lak. Da khana u leh wa da yaklam wa u Speaker wa ya u Montri Rangbah wow pynku cha ka Rs. 20 lak ha u snem wow wan yong u 2025.