Kiwa boon wa wan chibynta ha ki Olympics khamtam ha ki yalehke yasiat da wan ki deilang ki tiar kiwa katkam ka juk wa katni wow deiñ hei khmat, u tymmoh yei chkoor yow bait bha manda siat ki, tangwa uwa na Turkey uwa tip kam u Yusuf Dikec ym em u kam kini lait noh ka Pistol wei da jop u ya ka Takma Rupa ha ka yasiat Mixed 50m Pistol ha kani ka Paris Olympics 2024.
U Yusuf toh uwa 51 snem i rta wei ynnin hawa poi u ha Chatearoux Shooting Complex, ki paidbah da phylla ki wow yoo neibhah da yoo lakam wa bakla thaw u neidaw wym em u ki tiar ki tar kam kiwi kiwa chimbynta.
Manda siat u leh toh deiwa thap ya kawi ka kti hapoh kata wei i rukom yieñ u leh iwa yoo man aram bha hawa nujor wa kiwi kiwa da pynrkhiñ bha yei doh i pran ki.
U Yusuf da pawnaam u syndet syndet wei da mih leh boon ki Meme wa da chna ki bru ha ka Internet neibhah da phær bha u hawa nujor wa kiwi kiwa yasiat khatam kiwa na South Korea kiwa da man kam ki Robot hawa pait ya ki Lens wa deiñ ki najrong kiwi de ki tiar ki taar wa sy’at dor.
U Yusuf ymtoh dang ini wa chimbynta u ha ka Olympics heiwa da mihkhmat u ya ka Turkey ha u snem 2008, 2012, 2016 wa 2020 wei da jooh jop u ya ka World wa European Championship ha kiwa boon ki jait yasiat Pistol.
Hawa yaklam u wa kiwa thoh khubor, da ong u wa ym emkaam u ya kiwa boon ki tiar ki tar yow yarap ya oo wow siat, neibhah i yasiat man i kam iwa da em chwa ha oo.
Discussion about this post