Ka Ministry of Finance ka sorkar pyrdi da mynjur ko ya ka poisa kawa Rs. 2000 klur yow chna sarok wa kiwi de kiwa emkaam u chna kam chibynta ka 2nd Phase ka Meghalaya Integrated Transport Project (MITP), kawa jooh tip kam ka Meghalaya Economic Growth Accelerator (MEGA) Corridor Project.
Ya kani ka bhah poisa wa thymme da yoh deiwa ye u pynkrehkaam bha ya ka 1st Phase ka MITP heiwa u Montri Rangbah ka Meghalaya, u Conrad K Sangma da lai yachem u wa ka Finance Minister ka ri, ka Nirmala Sitharaman ha ka 24 tarik u Naisan, 2024, yow pynyoo ya ki kreh wa dang emkaam u pyndep yow yoh yarap chooh na ka Finance Ministry heiwa kattæ da mynjur ya kani ka mang tangka.
Ya ka 1st Phase ka MITP da pynkrehkaam deiwa yoh kyrchaan Rs. 880 klur na ka World Bank heiwa da pynchna ya ki sarok wa emkaam kam u Baejendoba-Resubelpara-Mendipathar-Damra, Shillong–Diengpasoh wa Pasyih–Garampani heiwa neiliang ka World Bank wa Ministry of Finance da kmen ki yeiwa da pynkreh.
Hapoh ka 2nd Phase ka MITP (MEGA Corridor) Project, daw chna palat 300 Km ki sarok (Double-Lane) kiwa neh u sah slem hanla joor u slap leh kam ha ki sor ka jylla nadooh ka Shillong, Tura, Jowai wa Dawki.
Ki sarok wow kreh kyrpang toh kiwa em ha sor kam ha ka New Shillong Administrative City wa ha New Shillong Knowledge City, yow pynkylla dur ya ka Shillong kam ka thaw wa da ku da paar.
Najrong kini daw chna leh ya ki Industrial Park, ki Warehouse, ki Agro-Processing Center wa ki yaaw ki haat yow pynku leh ya ka khayi pateiñ ha ki thaw wa em cha platsor deiwa pynbiang deilang wa ki sarok hapoh ka jylla.
Hapoh kani ka MEGA Corridor Project daw pynemkaam leh yow pteiñ ya ki kreh kiwa da lai chakhmat katni kam ka Shillong Dawki Corridor (NH 106 & 206), Tura Dalu Road (NH 217), Phulbari -Goeragre Road (NH 127B) wa ka yingkieñ Dhubro-Phulbari yow pynsuk yei lai i wan hawa khayi pateiñ yow poi cha ka thong ka sorkar kawa USD 10 Billion Economy kat ha u 2028.
Discussion about this post