Kam chibynta i lehkmen ya ka 78th Independence Day ka wow man ha ka 15 tarik, neiliang ka Loomkyrwiang Dorbar Chnong hei kitkhia ka Social Committee wa ka Khynroo Khyllood Committee ha ka 10 tarik uni u bnai da pynman ko ya ka Awareness cum Cleaning Drive Programme deilang ka Drawing Painting Competition.
Ha ka yalang yahkhmat yong kini ki yalang hei pynlai u Daioolang Pakma, Asst. Waheh Chnong da yoh ki kyntien sneiñ kyntien kroo wei kyrsu kyntu na u Lammat-Oo Laloo, Waheh Chnong katwa yei klam i batai wa kyrpang chaphang i khooid i jngiar katkam ka thong yong ka Swachh Bharat Mission da khana pysñiaw da u S.D. Laloo, General Secretary Loomkyrwiang Dorbar Chnong wa u Chibor Najiar, Adviser ka chnong uwa man leh uwi na ki sahep sorkar yong ka chnat PHE.
U Chibor Najiar hei klam kam uwi na ki heh sorkar wa embynta heiyatoh wa ka Swachh Bharat Mission hapoh ka jylla, da ong u wa i lehkhooid nadooh na yung hadooh ha lait toh iwa emkaam bha neibhah katni ki sngi ki khñiang kjut wa boonjait mih ki ha i dur ki rukom waphær deiwa kdaw nongmuna u leh ya ka Dengue Fever, kawi na ki kjut wa mih deiwa chah dait ha ki mait, wei kini ki mait toh man kiwa rap phær neibhah i por wow dait bru ki toh du hei janmiet donhi.
Chooh chooh da ong u leh wym myntoi u yoh i ka ka spah pyrthai lada ym ioh i yei chait i khiah. Hajrong ka thong yong kani ka sngi da pynsñiawthooh kyrsu kyntu joor u ya waroh kiwa chong wa sah hapoh u pood u ang ka Loomkyrwiang wow man kiwa tip u kheiñkor yei khooid i pliah wei chait i khiah wei wow ya krehlang leh wa ka dorbar chnong ha kiwon kiwon ki por khnang wa iwon iwon iwa damut damang ka chnong u leh neibynta i miat i bha ka imlang sahlang yow man iwa jop.
Khaddooh chwa wow yoh ki kyntien khublei na ka Heiioomitre Pakma, Secretary Social Committee ha ka thong yong ka Swachh Bharat Mission kawa tip leh kam ka Clean India Campaign, da em leh i purae ya ka Swachh Bharat Pledge da waroh kiwa ya chimbynta.
Discussion about this post