Pynthymme ka JNC ya kiwa ktikaam thymme ka Southern Border Zone

Ynne ka sngi, ka Jaiñtia National Council (JNC) CEC da yoh ko wow pynthymme wei pynskhem ya kiwa kitkaam yong ka JNC Southern Border Zone ha ka yalang wa da pynman ha Neiñchnong Cultural Club yong ka chnong Bataw, East Jaiñtia hills.

Ya ka yalang da pynlai da u Mebanteilang Sukhlaiñ, Publicity & Information Secretary, JNC-CEC wei da yoh ya ki kyntien pdiang burom na u Shanborlang Bamon, President ka Khliehriat Circle. Da yoh leh ki kyntien sneiñ kyntu na u Nangjan Dkhar, Vice President wa na u Philip J Bamon, Chief Organising Secretary JNC-CEC.

Ya i kaam wa kongsan wow pynskem wei wow pynsmai da pyndep da u General Secretary, JNC-CEC u Wanshwa Suting uwa da pynkynmoo wa ha kani ka kynti iwa kongsan tam ya i toh wow pait wow syndong wei husiar yei wan ki baar jylla cha kani ka bri u Ynñiawtrep wei yow man leh kiwa da pynkhreh wow ya mih ha iwon iwon i por neibynta wow yada ya ka ri yong ki.

Da pynkynmoo u leh ya ki le tylli ki mat kiwa kongsan hawa man kam ki dkhot ka JNC, itæ wow kamai yei hok wei wow tip kur tip kha wei wow tip bru tip blai, wei kini toh kitæ ki yurim wa hap wow booh hakhmat dooh ha ki kaam chakri khnang wow man sakhiat kitæ kiwa skem kamwa da hikai u warim ya i.