30 ngut ki bru deilang wa kiwa ha-yung ha-sem ki kiwa na Meghalaya da chah khut sñiawbha ki wow lai sakhi ya ka lehkmen lyngkhooh dap snem wa 78 i yoh laitlooid ka ri India kawa daw pynman ha New Delhi ha kani ka 15 tarik.
Ka sorkar India da khut sñiawbha ko ya palat 6,000 ngut na kylleiñ ka ri hajrong ka phang Viksit Bharat wei na kini da em 30 ngut kiwa na Meghalaya kiwa kynthup nadooh ki kynthai, ki khynroo khyllood wa kiwa mihkhmat ya ka NITI Aayog deilang ya ki dorbar chnong.
Kawi na kini toh ka Brotibon Mukhim kawa kreh kam ka ASHA kawa da pynsñiaw yei kmen wa da chah jied ko deiwa ong wa hawa leh ya iwon iwon i kreh toh u man kiwa kreh hok na mynsien.
Kawi na ki khynnah skur wa chah jied toh ka Laaibynta Mylliem kawa puræ Class 5 ha J.S. Memorial LP School, Laitlyngkot kawa da pynsñiaw yei kmen wow yoh u mih cha baar ka jylla hei sien wa nyngkong.
U Sanky Syih uwa man kam u Assistant Teacher ha Khliehriat Higher Secondary School, da pynsñiaw u yei sñiawngooh ya ka Prerana Utsav Programme heiwa oo deilang wa ki khynnah skur ka East Jaintia Hills District da yoh ki wow embynta ha kani ka lehkmen.
Ka Merilyn Nongrum, Secretary ka Seng Iakyntiewlang SHG na Umling C&RD Block leh da chah jied ko wow lai cha ka lehkmen Independence Day wei da pynsñiaw ko yei sñiawngooh ya sorkar jylla wa da jied ki ya ka wei da man i leh i sien wa nyngkong ya ka wow lai ko cha New Delhi.
Discussion about this post