Ka chnong Ratachera wa haap hapoh ka Elaka Narpuh, East Jaiñtia Hills District kawa da maad bha yei saja umbaam umdih deiwa hap thied bait na ki kari wa jooh li booh umdih, ha kani ka kynti da man i kmen wa khroo ya ki paidbah wa chong chnong neibhah wa haka 16 tarik uni u bnai, ka R. Kynjing, Executive Engineer PHE Electrical Division da wai paidbah ko ya ka Scheme saam umbaam umdih kawa wan na ka sorkar bei wa tip kam ka Jal Jeevan Mission (JJM) namo ka Scheme pynpoi um cha kut ki thlu yung.
Ya kani ka Scheme da tip kam ka Ratacherra Water Supply Scheme (WSS), da sdang kreh nadooh u Kmaichonglad (Dec) 2022 , wei i lut da khynjoh cha ka Rs. 5, 54,32,300.
I thaw wa taan ya kani ka um da tip kam ka Karia kawa jngai 16 Km na ka chnong Ratacherra, wei hadooh kamwa 400 tam ki manyung ka chnong Ratacherra wow yoh myntoi na kani ka um.
Ha ka yalang tbian wa pynlai da u waheh chnong Ratacherra, u Pynkhlain Dhar ha Community Hall ka chnong, da emlang u P. Syrti J.E. RWS, Jowai, u D. Pala, Contractor wa u Secretary chnong, u Bujli Sumer najrong ki dkhot ka Village Water & Sanitation Committee (VWSC) wa kynthup ya u Chairman, u Desous Pohshna, u Secretary, u K. Pohlong wa kiwi kiwi.
Ka R. Kynjing hawa klam ong ko kani ka sngi man ko leh ka sngi wow e kti noh ya kani ka um cha ka chnong Ratacherra kamjooh cha ki 400 tam ki manyung, deiwa kyntu leh ya ki wow em ki i bahkhlieh, i sñiawtre ya kani ka Scheme wei u sumaar u syndong ya ki thaw pynlang um, ki Pipe umkor wa lai cha ki yung khnang yow neh ko 30 snem kamwa da booh thong hapoh kani ka Scheme.
Neitæ da e khublei ko leh ya kiwa chong chnong wa da e ki i kyrchaan hei wow pynkreh ya kani ka Scheme hapoh chnong wei sñiawngooh ko leh ya ki sahep ka chnat PHE Jowai kiwa da kreh chitom u pyndep ya kani ka Scheme neibynta i myntoi ki paidbah.
Discussion about this post