Ynne ka sngi da sdang ya ka 4th Sumer League Football Tournament 2024, ha chnong Samasi hei pynlai da ka Sumer Socio Culture Sports Education and Entertainment Development Society hei ya krehlang waka Ams Entrepreneur Multipurpose Co-operative Society Ltd.
Ha kani ka sngi wai pyrda da emlang u Ditor Chyrmang kam u kongsan deilang wa ki lok yong oo heiwa da yoh yei klam lamphrang na u Amnesty Salahe kam u Secretary wa u Begin Paslein kam u President kiwa da batai yei thong yong ka SSCSEEDS wa kwah ko u kyntu wei pynku ya ki khon khynroo ka thaaiñ, wei da jooh pynman ko leh ya ka yakob pynyoo sap wa ki yalehke Sports kam ka U-18 Knockout Football Tournament wei kani ka bol yong kur da pynman hei sien wa soo.
Kani ka Tournament toh kawa chah du ya ki Seiñkur iwa mut chi kur chi jait wa kiwa yatoh kur wei toh u man ki kiwa yatoh napoh ka jooh ka Elaka wei ym chah ya kiwa yalehke wow lai na kawi ka Elaka cha kawi.
Neibynta uni u snem kiwa ya chimbynta da em ki 3 tylli ki Elaka kitæ toh ka Elaka Sumer, Elaka Sutnga waka Elaka Shangpung wei ki kur kiwa ya chimbynta neibynta uni u snem em ki 10 tylli ki Seiñ Kur kiwa man kamni:
Salahe Pakem FC Sumer Elaka
Paslein Combine FC Sumer Elaka.
Dkhar FC Sumer Elaka.
Lamurong FC Sumer Elaka
Chyrmang FC Sumer Elaka
Bamon Suja FC Sutnga Elaka
Bareh FC Sutnga Elaka
Dkhar FC Sutnga Elaka
Suchiang FC Shangpung Elaka.
Shulet FC Shangpung Elaka.
U Ditor Chyrmang kam u kongsan da e u yei sneiñ i kroo ya ka Society deilang i kyrkhu kyrdoh ya kiwa yalehke wym toh u em ki yei mynsien pynhiartput hawa yalehke tangwa toh u pynyoo cha ki paidbah yei em burom ki.
Ynne ka sngi da sdang ya ka yalehke wa nyngkong hapyrdi ka Chyrmang FC Sumer Elaka pyrchah ya ka Lamurong FC Sumer Elaka, heiwa ka Lamurong FC Sumer Elaka da jop ko da 2-0 da ka kool wa thap da u Rimon Lamurong ha ka minit wa 65 wa u Jngai Lamurong ha ka minit wa 82.
Ha ka yalehke wa bood, ka Salahe Pakem FC Sumer Elaka da yachem ko wa ka Dkhar FC Sumer Elaka heiwa ka Salahe Pakem FC Sumer Elaka da jop ko 2-0 da ki kool wa thap u Lamphrang Salahe ha ka minit wa 68 wa u Soldis Pakem ha ka minit wa 84.
Ki yalehke mynstep man ko hapyrdi ka Paslein Combine FC Sumer Elaka pyrchah ya ka Shulet FC Shangpung Elaka heipor 11:00 waje i step. Ka Dkhar FC Sutnga Elaka u yachem ko wa ka Suchiang FC Shangpung Elaka heipor 1:00 waje i sngi wei daw pynbood da ka Salahe Pakem FC Sumer Elaka pyrchah ya ka Bamon Suja FC Sutnga Elaka heipor 3:00 waje i sngi.
Kamtæ da kyrpaad ya phi ki paidbah wow sñiawbha phi u ya wan pynchit wei wow yoh phi u yoo dei khmat ya ka yalehke.
Discussion about this post